الأحد 4 ديسمبر 2022 10:47 صـ 11 جمادى أول 1444 هـ
 أنباء اليوم المصرية
رئيس التحريرعلى الحوفي

( هاتولي حكيم ) بقلم دكتور/ رفيق عفيفي

دكتور/ رفيق عفيفي
دكتور/ رفيق عفيفي

هاتولي حكيم يا اخواننا

مَشهور له شَنَّه ورَنَّه

حاسِس بِ وداني فيها زَنَّة

و عينيا مزغلِلَه سِنَّة

وجع كام ضِرس مع سِنَّة

دِراعي و كِتفي بِينَمِّل

صُباعي طالِع لُه كام دِمِّل

دِماغي في حوارات تِعمِل

ما هو مُخي بايِنُّه مُستَعمَل

أهرُشها يقولوا ده مقَمِّل

نَفَسي بَحِس فيه كَرشَة

أصلها تعبانة دي الفِشَة

و آلام جوه في الكِرشَة

بعد ما آكل حاجة حِرشَة

و كِرشي بَحِس فيه نَتشَة

و عندي نَفخَة في القَولون

قالولي قَرقَش فَص لَمون

ألهَط كام كيلو كالمجنون

أشوف الأبيض ميت لون

وأغلى الشيح عليه كمون

رِجلي حاسِسها مَلووحَة

وحتة في ضَهري مَشلوحة

من جوه الرُكبة مَجروحة

إحساس كَفَرخَة مَدبوحة

زي حالة ماما توحة

خلوه يِسَلٌّك مناخيري

مَسدودة معَلية شخيري

نايم وبَطَفِّش غيري

طبعاً ده واجِع لي ضَميري

وفاسِد لي سلوكي مع سيري

أما قفايا فَـ مِتلَمَّع

جديد بِتقفيلة المَصنَع

ومفروش عليه مشَمَّع

وفوقيه الشَعر مِتجمَّع

ما كَف عليه يوم طَرقَع

وصوتي يبح و انا بَغَني

جمهوري شهود وسامِعني

طبيب وما قراش عني

ده عيب إعلام و مش مِني

ما هو خسارة يضيع فني

كِتفي حاسِس إنه كان مَخلوع

لما كُنت في يوم مَجضوع

وكام عَضمة يسَموها ضلوع

وكل ليلة أبات موجوع

وجربت من الدوا كام نوع

عندي مرض وحاسُّه خطير

كتير عارفُه آل إيه بَوَاسير

أكيد مِ الشَطَة وسَدِة المَواسير

خلوه يشيلها بالتَبخير

بلاش فضايِح سِري فـ بير

قولوا له يِعدِل لي النَفسِية

أصلها مَعووجة شوَيَة

من ساعة ما هَجَرت بهية

و سُعاد و بَهانَة و فِكرية

وحَرموني مِن أكل الملوخية

وصباع رجلي عامِل أزمة

وارم و أكبر مِ الجزمة

كبير أخواته وله لازمة

معاملاته بِخشونة و حازمة

يعالجُه وياخد مِ الفلوس رُزمة

وقلبي يدُق بِالعافيَة

من سِحر الحُب بَلا قافية

ده أبيض نِيتُه صافية

دَستة مِن حوا ماهيش كافية

ما هو ده اللي حيجيبلي الكافية