( يا سنين الغُربَة ) بقلم دكتور/ رفيق عفيفي

يا سنين الغربة يا قاتلاني

واخداني بعييد للبر التاني

من كل الناس و حارماني

أهلي و اصحابي و خلاني

و زمايلي و حتى جيراني

و بنت جميلة عاجباني

بأدبها كانت ساحراني

خسارة رفضت تستناني

أمي على طوول وحشاني

متغيبش عن بالي ثواني

ياما كت قبلِك تترجاني

و أبويا في المنام جاني

متكونش على نفسك جاني

و تعيش على أوهام و أماني

حتكون في الغربة وحداني

و تقول للعمر استناني

رزقك مقسوم و ده أمر رباني

مسمعتش و شيطاني غواني

سنتين بس و هرجع تاني

أستحمل علشانكم و عشاني

أنا عمري ما كنت أناني

و يمر العمر و ينساني

و انا عايش هناك وحداني

و هموم الدنيا طاحناني

أنا إيه اللي جابني آه ياني

أصرخ ما في ودن سامعاني

أيامي حزينة و قاسماني

عَلِّمني و رَبَاني زماني

أنواع الذُل و وَرَاني

شَرَّدني و بنارُه كَوَاني

أنا إيه اللي عالمُر رَمَاني

أمراض بالكوم بِتِهواني

و أطبا كتيرة معالجاني

تايه بدور على نُصي التاني

أنا عاوز دكتور نَفساني

يرجَع لي نَفسي من تاني

طبيعي مش إنسان حيواني

و ألاقي نفسي ف أحضاني

فايق و رجع لي كَياني

لو فاضِل في عُمري ثواني

يا قَلبي راجِع لِك من تاني

حُضن أمي ده أصل مكاني

جاحِد و عليها أنا جاني

سامحيني يا نَبع حَناني

بِفَضلِكَ أنا ربي رضاني