هجرتِك بقلم دكتور/ رفيق عفيفي
شُوفي فاتِت كام سَنَة لَمَا هَجَرتِك
مِن يوميها لساني مالوش إلا بس سيرتِك
حتى عيني و الله ما بٌتشوفش إلا صورتِك
حُب العُمر كُله ضَيَعتيه والسَبب كانت رعونتِك
مِش كُنت انا زي ما قُلتي قَمَر بِينَوَر في ليلتِك
و تروح روحِك لو أنا جيت يوم فارِقتِك
و لا تِحلى لُقمَة ليكي إلا لو فيها شارِكتِك
مِش اتوَلَدتي بَس يوم ما حَبيتني وعِشِقتِك
و انا الحَبيب اللي بتِحلَمي بيه مِن أيام طُفولتِك
انا اللي خَليتٌك تِحِسي بجَمالِك و حَلاوِة أنوثتِك
فاكرَة لَمَا حَوِشت واشتريت دِبلِة خُطوبتِك
قَلبي كان فَرحان و بيها جيت على بابِك فاجِئتِك
و زعِلتي مِني لَمَا بِبرائتي على خَدِك وبوستِك
ولَمَا حَصَل انسِجام بين العِيلتين عيلتي وعيلتِك
كَتب الكِتاب بَعد بُكره يوم الخميس كانت مَقولتِك
وكان جيرانك أو صُحابك بيقولوا لِك آه يا بَختِك
و كانت أحلى ليلَه في العُمر هي ليلتِك
كُنتي بِجَد انتي قَمَرها ونجومها أهلي وعشيرتِك
حُبي كان بيزيد يوماتي لما عِشت وَياكي وعاشِرتِك
أحلي أيام عُمري قَضيتها كانت في أحضان مدينتِك
تِنكِري إني شلتِك جُوه عيني جَوهَرة برموشي صُنتِك
و العجيبة إنُه في ساعِة غَضَب فجأه تِتغَيَر عَجينتِك
راح فين الحُب قوليلي وراح فين حنانِك وطيبتِك
أنا بريء من ذنوب الهَجر لكن هو الذَنب ذَنبِك
كُنت اتمنة طول العُمر وعُمرين أبقي جَنبِك
إسألي قلبي اللي ما بيدُق إلا بحبك
ما تِقوَة رِجلي على مَشي في طَريق سوى في دربِك
طول عُمري طايِر في السَما بِجناحين في سِربِك
يِشهَد على حُبي وسَلامِة نِيتي رَبي وربِك
أنا برضُه باقي على عِشرِتنا ولِسَة بَحِبِك
اطردي الشيطان من سِكِتِك واستُفتِ قلبِك
ما هو ده البعيد اللي جِه في لحظَة على دماغِك وضربِك
لو انتصَرتي عَلِيه راح تفُكي قَوام كَربي وكَربِك
لو في يوم عَدَى إسمي بشَفايفِك صَحَي حُبِك
حَتلاقيني في لَمح البَصَر بَقيت في أحضانِك و جنبِك
