(عُمر اتسَرَق .. في المُفتَرَق) بقلم دكتور/ رفيق عفيفي

في يوم و انا شارد و في قلب الليل قاعِد وحيد

حاسس إني أنا وحدي الحزين وإن باقي الكون سعيد

غالباني أحزاني و أوهامي وحاسس بانكسار

عايش في ليل طوييل و مِش طالع له نهار

قلت أمشي شويه في شوارع وسط البلد

و رسمت علي وشي ابتسامة صبر و جلد

شارع طويل عريض و فجأة وقفت عند المفترق

عيني بصت عاللي فات و سرحت ف عمري اللي اتسرق

تجاعيد ف وشي وخدود من الحزن اتكرمشت

و فُرشة ب بوية بيضا جت علي راسي و طرطشت

فين الطفل اللي جوايا و ضحكته كانت ماليَه المكان

يرد عقلي متهكماً علي خيبتي ده كان زمان

رغم إن الفقر صاحبي و عايش في أحضان الحضيض

عيشة كانت لونها كُحلي تخللي أجدع ديك يبيض

كان الكتاب في أوله صفحاته م الفرح بيضا

ليه بعدها إتلونت ما بين رمادي و سودا

طول عمري ماشي مستقيم و معرفش طريق الحماقة

و أصون العشرة و العيش و الملح و وياها الصداقة

صداقة مع أقراني من جيراني و زمايل دراسة

مع اتنين تلاتة م الأشرار اللي جايز يعلموني الشراسة

غلب عليه طباعي الأصيلة و نفسي الخجولة

ما في نواقص ولا ندالة بس بزيادة الرجولة

لما كبرت و كنت بشكي وحدتي ل طوب الحيطان

رشحولي عروسة حلوة م الحتة ما هي دي فُلانة بنت الجيران

جابتني من فوق ل تحت و نفس طويل و اتنهدت

قالولي قطة مغمضة و اهو جه عَدَّلها اتبغدِدت

شبكة و مهر و الجهاز رقم كبير تقولشِ ميزانية بَلَد

قُلت لنفسي يا ريت ما كان اليوم اللي أنا فيه اتولد

عزوبية حلوة مفيش كلام خليكي قاعدة جنب بابا

انا زي الشمس منورة عمر ما يحجبها سحابا

و رجعت كما كنت الي قواعدي سالم

و ربي هو اللي أرحم و هو بأموري اللي عالم

اللي شاروا عليه بيها قالولي معلِش خيرها في غيرها

رديت و قُلت خلاص المسألة دي معايا جابت آخرها

انا في الشِعر المُهيب و انا اللي في الطب الطبيب

هم اللي مالهومش في الطيب أبداً نصيب

عديت و سِبت المُفتَرَق واخداني تفاصيل الحِكاية

يا نَفسي فوقي و اعقلي بس ارجَعي لخَط البداية

لازم تقوم من كبوِتَك لازم يكون عندَك أمل

سيبَك م اللي ح ينكد عليك أو يسبب لك لحظة مَلَل