الجمعة 29 مارس 2024 12:34 مـ 19 رمضان 1445 هـ
 أنباء اليوم المصرية
رئيس التحريرعلى الحوفي

الدكتور رفيق عفيفي يكتب: ”تاجر السعادة”

الدكتور/ رفيق عفيفي
الدكتور/ رفيق عفيفي

يا اهل البلد أحلامي عن تم التمام اتحققت

ما انا إيدي من كتر الكتابة بالأقلام اتشققت

و عينيا من كتر المذاكرة بالسلامة اتمققت

ما هو آخرة المتمة أصبح محسوبكم طبيب

بتاع كله و في المسالك شيء عجيب

أي مريض بعون الله علي إيدي قوام يطيب

أهل الخير فادوني و علي التخصص لاموني

قصدهم مصلحتي أو عشان سواد عيوني

أنا محتار يا سيدنا دول ودوني و جابوني

سيبك م المسالك أصله تخصص عسير

شوف لك شغلانة تانية اتخصص في البواسير

تعمل لك أحلي سمعة و تكسب حتي فلوس كتير

معجبنيش الكلام أهو كله دش و السلام

كل الطرق عصيبة و كلها محفوفة بآلام

المهم أفيد مريضي بالحرفة ويا العلام

من كتر العِلم و مشاكلُه حاسس إن دماغي ساحت

من الهَم اتغير شكلي حتى سنين العمر راحت

أغير الكاريير أهي فكرة و في عقلي لاحِت

أملك و عن جدارة فدادين حظ و شطارة

و كمان بجد خطير و فريد في علم الإدارة

سلاسل محلات كتير للأعشاب ويا العطارة

بوصفات حلوة و لولبية أغسل هموم الناس

م الصبح للعشية أسقيهم سعادة في كاس

كله سعيد مبسوط ما بينهم شقي ولا محتاس

بالهنا فطارهم عليه أطنان باتيه و باتون ساليه

و الغدا كباب و كفته و معاهم فراخ بانيه

و العشا على نغمات في أوبرا و كمان باليه

نفسي تبقى كل الناس حواليا سعيدة

و معاهم كتير فلوس و ما في حد منهم ع الحديدة

الصبح ساكنين في الزمالك و العصر في مصر الجديدة

في الصيف كله بالمايوه بيبلبط على الشطآن

في الشتا كله في دفا و جمال أسوان

مفيش قلق و لا توتر كله عايش في الأمان