في عيدك يا أمي بقلم دكتور / رفيق عفيفي
كل كلام الحب قالوه عن أُمي و كمان غَنُّوه
اللي ف قلبي طبعاً أكتر و احلى م اللي الناس عرفوه
ده الحب اللي بيجري ف دمي و حنانها اللي بيمسح هَمي
حلاوة الدنيا فيكي يا أمي و أجمل لحظة لما تضُمي
ماما يا أحلى غنوة و أول كلمة نطقها لساني
لما بَسمع حد يقولها تصحي قلبي تهِز كياني
قلبي بيرقص و بدَقاتُه بيغني ألحانه ب إسمِك
عيني تفرح لما تشوفك أصلها تعشَق تفاصيل رسمِك
حِصن حَصين طول عمرك يا امه من أول لَحظة ف طفولتي
ربيتي و عَلِمتي و صُنتي في شبابي و ف حتي رجولتي
مهما قُلت ومهما وصفت مش ممكن اوَفيكي الحق
رحلتي و حِسِك ف الدنيا ل جنة ربي في دار الحق
وَضَع الجنة تحت اَقدامِك ما هو ذَكَرِك ربي في كتابُه
و نَبيه صلي الله عليه وصانا لما سأله حد من اِصحابُه
اللي عنده أم يصونها و يبوس في إيديها و رجولها
و اللي يزَعَل أمُه يا ويلُه ريحة الجنة مش حيطولها
