أشرف عبد الكريم يكتب : شاعر على قدي

دلوقتي بلملم في حروفي

وبجمع في بيوت أشعاري ..

فيه كلمة تكسر في ضلوعي

وفي كلمة تحلي ف أيامي ..

وبرص قصيدة على التانية

وبفكر أبدأ في ديواني ..

ولقيت الإحساس بالكلمة

بيضيع من وقت للتاني

وكأن مشاعري كانت بردة

مقدرتش أمسك أحزاني ..

ودموعي باتت على خدي

وبدأت أكتب من تاني

قطعت كام ورقة بيدي

واحترت ان اختار عنواني ..

قلت اكتب عن همي وذاتي

أو أكتب سطرين لبلادي

أو جملة بسيطة عن العشاق

ملاقيتش الكلمات عجباني ..

وقعدت مابيني وبين نفسي

والدنيا تاخدني وبتجيبني

وسألت سؤال ملاقيتش جواب

عن حالة اليأس اللي ملكني ..

أنا شاعر ولا دي أوهام

دي أبياتي محتاجة ميزان

والله انا شاعر على قدي

والناس بيقولوا ان انا فنان ..

انا لازم اراجع أوراقي

وأشوف ايه فيها بيتعايب

وازاي انا افكر في ديواني

وانا لسة محصلتش كاتب ..

وكفاية بقى شهادات تقدير

مش عايز حد يجاملني

أنا عايز أحس بالتغيير

وساعتها الكل يكرمني ..

واظهر ع الشاشة واكون قادر

وأقول للعالم دي حكايتي

انا كنت بقول ان انا شاعر

وانا كل كتبته خواطري ..