الشاعر أشرف عبد الكريم يكتب ” أنا غيرهم ”

يدوب لسة بفوق منك
ومن قلبك وتنهيده
لان اللي يعيش جنبك
دا شايل كفنه على إيده ..

هوايتك تجرحي ف الناس
وعايشة أكيد بدون احساس
وكل اللي شرب م الكاس
لبس اسود في يوم عيده ..

ومين فيهم مداقش المر
وعاش ليكي كأنه ظل
يا غاوية تكسري في الناس
وتتباهي أمام الكل ..

كتير بيحاولوا يرضوكي
لكن بيتوهوا حواليكي
وخدعاهم وسرقاهم
بضحكة صفرا في عنيكي ..

تشاوريلي أكون منهم
أكون واحد لابس توبهم
لكن قلبي ماهوش للبيع
أنا مشاعري أكيد غيرهم ..

نصيحة خديها بقى مني
كفاية غرور واهتمي
بأخلاقك واحساسك
وخليني أنا ف همي ..

دا لسة معاكي ياما نشوف
واللي مايشتري يتفرج
بكرة تكوني وش كسوف
ونقولك الله يعوض ..