أشرف عبد الكريم يكتب / بعد الجواز

زي أي اتنين أحبة
إلتقينا في الغرام
كان هدفنا نبقى عيلة
كان مابينا الإحترام ..

واتفقنا على الخطوبة
شبكة ويا كام هدية
قلنا نبني كل طوبة
والتقيل هايكون عليا ..

مرت الأيام علينا
فجأة جه وقت الزواج
شوفنا يومها أحلى ليلة
صورة مرسومة بمزاج ..

باليمين خطت عتبتها
شيلتها كانت ملاك
فكت الطرحة بتاعتها
وابتدينا الإشتباك ..

في الصباح الأم نادت
قاعدة تضرب ع البيبان
إفتكرت الثورة قامت
واحنا في قلب الميدان ..

رحت رافع راية بيضا
قلت أبدأ بالسلام
جات حماتي بنظرة سودا
وف إيديها جوز حمام ..

وبهدوء دخلت عليها
عايزة تاخد التمام
ضحكت البنت بعنيها
زغرطت وسط الكلام ..

لما خرجت شكل تاني
جات في غاية الإنبساط
جاية بتقدم تهاني .
جاية تسحب في البساط .

وابتديت ادخل ف دنيا
فيها ميت ألف سؤال ؟
خلي بالك بنتي غاليا
دي وراها كتير رجال ..

انا يابني بهدي النفوس
اوعى عليها ف يوم تدوس
او تجيلي ف يوم تقولي
انك مقصر في الفلوس .

بعد فترة مش بعيدة
ابتدى يقل الكلام
لقتني فجأة ع الحديدة
والسبب أم المدام ..

الجواز مش بنت حلوة
الجواز أصل وكيان
لما تيجي تحب واحدة
ابقى اسأل الجيران ..