أشرف عبد الكريم يكتب ” قلب ميت”

شوفت يا قلبي إيه اللي جرالنا

شوفت الغالي بيعمل إيه

بعد ما كنا الحاجة الحلوة

فجأة يا قلبي اتغير ليه ..

قولي يا قلبي السر في بير

عمر ما حد هيعرف غيري

أصل انا زيك جرحي كبير

واللي وجعني هو ضميري ..

قول ماتخفش مش رح اسيبك

ما اللي طايلني هو نصيبك

ماهو انا وانت اكيد روح واحدة

يعني حبيبي هو حبيبك ..

بس يا قلبي اياك تخدعني

وتعمل نفسك انك خالي

أصل مشاعرك هي مشاعري

ولا شايفني واحد تاني ..

أنا عن نفسي مش رح أسلم

ولا أقول بطلت أحب

وانت أكيد لازم تتعلم

ان الدنيا دي ساقية كب ..

كل يوم تلاقيها بحال

ميت حدوتة وميت موال

واللي بيظلم قلب بيصبح

مجرد ذكرى بين الأطلال ..

يالله يا قلبي ما تتعبنيش

نبدأ صفحة جديدة نعيش

اسمع مني عشان متموتش

ولما تدور متلاقنيش ..

هو القلب الميت إيه

غير شريان تتعكز بيه

عمره ما دق في يوم ولا داق

طعم الحب اللي بيرويه ..