” يلا قومي ” للشاعر : أشرف عبد الكريم

ماتقوليش ان اللي بينا

تاه في حبات الرمال

ماتناديش على قلب خانك

وتنسي حبك اللي كان ..

فكري ف أصل الحكاية

وشوفي مين فينا اللي خان

هو باعك م البداية

هو سابك من زمان ..

هو بيقطع في سيرتك

هو مش حاسس بقيمتك

ورغم إنه ابن بطنك

صدقيني مالوش أمان ..

دانتي ياما وقفتي جنبه

كل مرة تدافعي عنه

بس هو قضى عمره

كل همه جاه ومال ..

يلا فوقي واعرفيه

لفي طوقك واعزليه

ووعي يوم تبكي عليه

حتى لو رد السلام ..

اما انا فبلاش ياغالية

حبي ليكي حاجة تانية

حب قد الدنيا دية

حب مش محتاج كلام ..