أشرف عبد الكريم/ يكتب : أبين زين

سبع ودعات في منديلها
وماشيا تقول أبين زين
ضربة الودع بنظرتها
وسارقة الكحل جوة العين ..

غجرية بشعر طويل
وشاغلة الناس بضحكتها
وشامة تزين الخدين
وصوت خلخال في مشيتها .

ترص من الكلام أشعار
وتغمذ للي قلبه إحتار ..

وعشان انا ضعت ف حكاية
وبتعلق في قشايا
ندهت عليها جات كالريح
كأنها عارفة اللي جوايا .

قالت وشوش وقول طلبك
هقولك يابني إيه وجعك
حياتك كلها أسرار
لكن قلبك سبب ألمك ..

عاشق واحدة مهيش منا
بجمالها الناس بتتغنى
لكن الأصل مش فيها
وجواها نار مش جنة .

دي ساكنة في برجها العالي
في قصر كبير مالوش تاني
بلاش المر يا ولدي
وبكرة تشوف حبيب غالي .

يصونك مهما كنت بعيد
وتشتاق حتى وانت قريب
دي زينة البنت أخلاقها
ومشاعرها في لمسة إيد ..

وحط الحلقة في ودانك
دي صورة وعايشة في خيالك
لا ليها مكان ولا عنوان
حياتك هي اللي بقيالك ..