( سيبَك : إمسِك ) بقلم - دكتور / رفيق عفيفي
سيبَك
سيبَك م اللي في الضهر يصيبك
وش ف وش ظريف و حبيبك
سيبَك م اللي يقَلِب جيبَك
و اللي تَملي يفضَح عيبك
سيبك
سيبك م اللي معاه علي طول
أي طريق دايماً مقفول
سيبك م اللي معاه معلول
فكرك ولا البال مشغول
سيبك
سيبك م الكداب في كلامُه
ساعة الجَد ما يرمي سلامُه
سيبك م النطاط ب عَلامُه
و اللي بيفجُر ويا خصامُه
سيبك
سيبك م اللي يصاحِب كيفُه
مش راح تبقى يوم على كيفُه
سيبك م اللي يحُوش مصاريفُه
و بخيل عُمره ما يكشف زيفُه
سيبك
سيبك م اللي دايماً ظالم
حواليه ناس ليها مَظالِم
سيبك م اللي عامِل فيها عالِم
واضحة علامات جهلُه معالِم
سيبك
سيبك م اللي لجميلَك ناكِر
اوعى تنسى و خليك فاكِر
سيبك م اللي لنِعَمُه ما شاكِر
إمبارِح و اليوم أو باكِر
سيبك
سيبك م اللي عقلُه خفيف
و غتيت فاكر نفسه ظريف
سيبك م اللي ف طَبعُه عنيف
و فاكِر روحه أبو العُريف
سيبك
سيبك م اللي مش محبوب
للكُل و عمره ما كان حبوب
سيبك م اللي عواطفُه يا دوب
تِعمِل م الـِّ حجارة قلوب
سيبك
------------
إمسك
إمسك في اللي قلبك يهواه
صدفة ف قلب الخير و رَماه
إمسك في اللي ربُه هداه
عن أبواب الشر عَمَاه
إمسك
إمسك في اللي قلبُه حنَيِّن
نضيف و صريح واضح بَيِّن
إمسك في اللي طيب لَيِّن
اللي كلامُه جميل و مزَيِّن
إمسك
إمسك في المحمودة صفاتُة
أصل و طيبَة و علي نِياتُه
إمسك في اللي صافية صلاتُه
لِرَب الكون و زاينَه حياتُه
إمسك
