قيس و ليلي ٢٠٢١

أعمل إيه دلوني يا أهل الغرام

كل يوم اشوف حبيبي في المنام

طيفه في حضني ليلاتي بدون كلام

كان الحب لسه ف أوله و كنت انام

كان يجيني حتي في وقت الخصام

لكن لما الشوق حمي و زاد اضطرام

بقي يصاحبني السهر و عز عليه المنام

شمس تروح و شوية ترجع تصحي الأنام

ما ادري بحالي و لا اعرف بقينا الساعة كام

لا بطول عنب اليمن و لا بدوق بلح الشوام

يا اهل الفضيلة و الشرف فين الإمام

قولوله عاشق عندنا عقده انفرط فلت الزمام

شوفوله واسطة بينه و بين أهل الكرام

ابعتوا مرسال لعمي شوفوا مهر ليلي كام

أنا كنت رايح اعمل قرض من البنك وقالوا حلو الكلام

مملكش من حيطان الدنيا إلا بنطلوني و الحزام

متدقش علي فانلة أو قميص شوفهم بكام

علشان عيون اللول أبيعه و الله و معاه الحزام

لما يلاقوني كده حصعب عليهم يا حرام

لاجل عيونك يا لولتي استحمل ذل ابوكي الهمام

و انتي عليكي تليني دماغ حماتي و تظبط لأبوكي اللجام

قصص الحب الكبيرة محفوفة دايماً بالآلام

شوفي ذكرياتنا لما كنا نتشعبط في ضهر الترام

و الدهب أيامها فاكره كان بتعريفة الجرام

و العملة كان ليها شنة و رنة رغم ما فيها من خرام

الدنيا بقي فيها العجب قل الأدب كتر الزحام

يا ليلي ياللا نتخمد لو في ايدكي شوفي الساعة كام

شكلي بخرف م السخونة قيسي الحرارة و ورينا العلام

يا ست اهدي دي مش كورونا.. ده مجرد حبة زكام