أنا المصري .. بقلم دكتور / رفيق عفيفي
أنا إبنك و شرف ليَ إني خرجت من بطنك
أنا اللي لوني من قمحك و من نيلك و من أرضك
أنا قلمك و طول عمري أوصف في جمال حسنك
أنا واحد من رجال جندك بصون حدك و اصون عرضك
إنتي شرفي و فخاري و حياتي كلها لاجلك
أنا حبة في ترابك اللي أغلي م الألماس
أنا فرشك أنا غطاكي أنا اللي خدودي ليكي مداس
أنا قلمك أنا صفحة في كتابك أنا سطور من الكراس
أنا و الكل داق خيرك و وقت الجد إحنا الجند و الحراس
إنتي وسام علي صدورنا و انتي تاجنا فوق الراس
يا أرض امي و أبويا.. اخوالي اعمامي و جدودي
إسمك أحلي شيء في الكون و شم هواكي ده وجودي
شموخي باخده من إسمك ما هو إنتي سندي و عامودي
تَنِك رافعة راسك فوق و علينا نادي يا اولادي يا أسودي
إسمك أجمل الألحان و أحلي كمان علي عودي
مصر يا أم الدنيا يا حلوة و حتة م الجنة
في جدور التاريخ ضاربة و أهرام مبنية ب فراعنة
أم الحصري و المنشاوي و رفعت و محمود علي البنا
طه و محفوظ و العقاد و شوقي و رامي كانوا عايشين هنا بينّا
و خد عندك نغم درويش و عبده و ثومة ليهم شنة ليهم رنة
يا أم الدنيا يا أمي ده لحم كتافي من خيرك
تعيشي يا غالية و تضحي أنا مالي وطن غيرك
أحب كل شيء مصري و مع المصري من أصغرهم و ل كبيرك
إلهي يحفظك لينا و يبعد أي شي يضيرك
و تِعلي فوق كمان و كمان و أد الدنيا ده مصيرك
