غنوة عصاري (زجلية) بقلم - ناجح وهبة
قلبي مليان ذكريات
عمر عدا وحب فات
قلبي مليان بالحكاوي
اللي عايش واللي مات
قلبي يا غاوي الغناوي
هات كمانك هات لي عودي
اضرب أوتارك و قسم
قول لأحلى أيامي عودي
قول لناس راحت وكانت
ميتي اللي بتسقي عودي
لسة أنا واقف بغنِّي
والزمن ما كسرش عودي
....................
عمي يا بتاع الغناوي
نفسي أغني يوم معاك
نفسي أكتبلك قصيدة
تبقى غنوة ونغمة حلوة
نفسي أجيب لك أمنياتي
نفسي أصوغ لحن لحياتي
لما أطير واوصل سماك
.................
عمي يابتاع الحكاوي
نفسي أسمع يوم حكايتك
نفسي أشوف نفسي في مرايتك
واعرف انت كيف بتحكي
كيف تضحكنا وتبكي
كيف بتلضم خيط حكاوي
نسمعه نلاقيه حقيقة
وما أبصلك دقيقة
التقي طلع الصباح
والتقي الصمت المباح
