هشام يكن : أول من قدّم محمد صلاح للمقاولون العرب ... وجيلى مظلوم في الزمالك

تحدث هشام يكن نجم مصر والزمالك السابق فى مداخلة هاتفية فى برنامج " التتش وزامورا الذي يقدّمه الإعلاميان ناصر أبو المجد ومحمود سيد في لقاء خاص عبر أثير إذاعة "99 FM"، عن أبرز قضايا الكرة المصرية فى الفترة الأخيرة.

اللقاء لم يخلُ من المصارحة والمفاجآت، حيث فتح يكن الملفات الساخنة بشجاعة وشفافية، متحدثًا عن أزمات الإدارة، واكتشافه للنجوم، وتجاهل جيله، مرورًا بصراع الأجيال، وحتى رأيه في الإعلام والجماهير والمواهب التي يرى أنها الثروة الحقيقية للمستقبل.

وعن أدارة الكرة فى مصر أوضح هشام يكن : " الكرة فى مصر تدار بعشوائية ، مشيرًا إلى أن الوضع الحالي هو "عك كروي"، الأخطاء كثيرة وتفتقد الحزم، والرابطة ولجنة التظلمات منتظرة نتائج المباريات علشان تتحرك، وده معناه إن مفيش نظام حقيقي."

وعن أزمات نادى الزمالك مؤخرا وتغيير المدربين ، قال : "هناك تجاهل تام لأصحاب الخبرات، واللاعبين الحاليين مش قادرين يدافعوا عن اسم نادي الزمالك، وده باين في النتائج ، كنت دائما أقف بمفردى في وش الصراعات، وأدافع عن النادي بروحي، لكن جيلي كله اتظلم، ومحدش بيستعين بينا رغم إننا نقدر نقدم كتير."

وأكمل : " المشكلة إن مش كل نجم سابق يصلح يكون قائد حالي، اللي بيمسك دلوقتي مفيهوش المعايير المطلوبة للقيادة ، أنا دبلوماسي ومش بحب أزعل حد، بس الحقيقة إني أقدر أقدم كتير للزمالك... أقدر أبني قطاع ناشئين قوي، وأفيد الإدارة في التخطيط، وأجمع رموز النادي، وأعمل أكتر من كده بكتير."

وعن اختيار أيمن الرمادي ، قال : " لا أرفض أن شخصية أيمن الرمادي، لكن أرفض المبدأ، الزمالك مليان مدربين أصحاب خبرة وتاريخ، والاختيار من بره النادي تجاهل لولاده اللي ضحّوا عشانه."

وأشاد يكن بجماهير الزمالك، وقال: "أعظم جمهور في مصر، جمهور وفيّ ومخلص، شال النادي على كتافه في أصعب الظروف، بس للأسف محدش بيقدّر ده... الجمهور محتاج يشوف خطة واضحة، مش وعود فاضية."

وعن الإعلام الرياضي ، وجه يكن انتقاداته للإعلام قائلاً: "بقى بيدور على الترند مش الحقيقة، وبقينا نسمع تصريحات بتزود الاحتقان بدل ما تحل المشاكل... الإعلام المفروض يكون شريك في التطوير مش طرف في الصراع."

كما أشار يكن إلى أن مصر مليئة بالمواهب اللي محدش بيشوفها، وقال: "إحنا عندنا كنوز في الشوارع والمدارس ومراكز الشباب، ممكن يبقوا أحسن من اللي في الدوري، بس مفيش خطة واضحة لاكتشافهم."

وأضاف:"لازم نرجع نهتم بالمواهب من القاعدة، ونعمل مشروع حقيقي لاكتشافهم وتأهيلهم فنياً ونفسياً... المواهب دي هي رأس المال الحقيقي لأي نادي أو منتخب."

وأوضح هشام يكن "أنا أول من طالب بانضمام محمد صلاح وزيكا لصفوف المقاولون العرب، وقت ما كنت مساعد للكابتن مصطفى يونس في المنتخب... واسألوا الإداري أيمن حافظ واكتشفت أيضا أحمد حجازي، و محمد عواد، وغيرهم كتير، وعندي عين فنية تقدر تختار وتصنع فرق."

واختتم حديثه برسالة واضحة وصادقة: "أنا تحت أمر نادي الزمالك، ده بيتي الأول والأخير، وحلمي أعد جيل جديد زي صلاح، وحجازي، وعواد، وزيكا... وأكتر كمان."