أنباء اليوم في حوارٍ خاصٍ مع خبير اللغة الإنجليزية ”مصطفى عاطف”
من الحقائق الثابتة أنّك تستطيع أن تنجح بسرعة وبأفضل طريقة، عندما تساعد الآخرين على النجاح ، ودا إحنا شوفناه في شخصية ضيف الحوار اللي معانا ، رغم بداية ظهوره إلا إنه خطف الأنظار من خلال حرصه الدائم علي مساعدة الغير .
لا سيما أن كل الفئات استفادت من علمه ، رغم صغر سنه إلا أنه حقق إنجازات ملموسة.
ضيف حوارنا النهاردة هو المدرب و المترجم وخبير اللغة الإنجليزية / مصطفى عاطف
خريج كلية الآداب والذي أسس مبادرة ضمن المبادرات الأنسانية الشبابية وهي " تعيلم اللغة الإنجليزية أون لاين " (من المنزل) ، والتي تعد أحد أكثر الأمور شيوعا في الفترة الأخيرة خلال جائحة كورونا .
نجح "مصطفى" في لفت نظر الصغير قبل الكبير على
السوشال ميديا من خلال الفيديوهات التنموية الخاصة باللغة الذي كان حريص دائماً علي عرضها لنا .
في بداية حواري أحب أرحب بحضرتك أستاذ مصطفى ...
أهلا بيكِ إزي حضرتك يارب تكوني بخير
_ لو هنلخص حياة مصطفى عاطف في سطور هتكون حيايته عبارة عن إيه؟
حياتي عبارة عن شويه طموح على اجتهاد على سعى على توفيق من ربنا على حبى لـ أهلى وحبى للحاجة اللى بعملها وبحب الحاجة اللى أكون بعملها أكون بعملها بحب وبضمير كدا .
_ بما إن حضرتك خريج آداب لغة إنجليزية هل للكلية دور فعال في مستواك في اللغة ولا دي مجرد مرحلة من مراحلك؟
لا خلينى أقول إن الكلية نفسها دراستها مكنتش مؤثرة على الـ English نفسه ولكن هو كان مؤثر عليا أنا شخصياً بتعاملى مع دكاترة أنا بحبهم وفى نفس الوقت عرضنى لمصطلحات أكتر أو لغة أكتر ولكن كلها خاصة بالأدب والنثر والشعر والحضارة والتاريخ فمكنش الموضوع ليه علاقة بالـ daily English فاممكن اعتبرها مجرد مرحلة من مراحلى ولكن بردوا اداني ثقة أمارس الإنجلش أكتر أثناء المحاضرات لأن طبعاً الإمتحانات بالإنجلش والـ oral بالإنجلش والـ presentations بالإنجلش .
_ مين أكتر شخص كان داعم ليك في مشوارك التعليمي ومازال داعم لحضرتك في مشوارك المهني؟
أكتر حد داعم ليا كان والدى وأخويا ووالدتى طبعاً وكذلك اخواتى البنات لأن هما كلهم يعتبروا شغالين معايا أصلا وصديقى الصدوق محمود دول أكتر ناس كانو داعمين ليا ومازالوا داعمين ليا وكلهم أساساً موجودين معايا فى مشوارى مش مجرد كلام لا موجودين كمان فعل مش بس أنهم بيشجعونى وبنحقق مع بعض كل حاجة .
_ اللغة الإنجليزية هي بمثابة كابوس لكل طالب مصري ، إيه الإضافة اللي حضرتك ضفتها غيرت من المفهوم دا عند الطلاب؟
الإضافة اللى أنا ضيفتها إن أنا أساساً كان عندى مشكلة مع الإنجلش وكان كابوس بالنسبالى و كنت بكرهه الإنجلش جداً لكن لما أنا اتعاملت مع أجانب وبقي عندى حصيلة كلمات كتيرة بدأت إن اذاكر الدروس دى لوحدى حتى محدش شرحهالى أما درستها لوحدى قدرت إن أنا ألخصها بنفس الطريقة اللى أنا ذاكرتها وكانت طريقة باللغة العامية عشان كدا عملت أول كتاب إنجلش جرامر باللغة العامية وكان عندى ١٩ سنة فا لما عملت كدا وبدأت أشرح للناس بنفس الطريقة اللى اتعملت بيها كان الموضوع فعلاً سهل وكان ممتع جداً بالنسبالهم فمبقاش كابوس هو الفكرة إن أنا بس عملت طريقة جديدة أدرس بيها كمان الـ separate courses كورسات منفصلة مثلاً بتجيلى عشان أعلمك النطق بالـ American accent نفس الكلام تجيلى عشان تتعلم الجرامر كله ، تجيلى عشان أعلمك تتطبق النطق والجرامر فى Conversation فكان الموضوع إن أنا بسطت الأمور ودا كلام الناس مش كلامى لما الدنيا اتبسطت أكتر فهموا بقي الإنجلش تركيبه والكلام دا كله.
_ لكل ناجح أعداء، وطريق النجاح مش سهل، إيه العقبات اللي قابلتها في مشوارك وهل اتعرضت لمواقف سخيفة من حد قبل كدا؟
خلينى أقول مش أعداء يعنى هو مش كل الناس بتحب تشوف الناس ناجحة مش كل الناس بتشوف اللى حواليها ناجحين فى ناس بتحس بالغيرة وناس بتحس بالحقد وهكذا ممكن يكون من الناس اللى حس كدا ناس قريبة منى وممكن كانوا خايفين مثلاً اتاخد منهم ، حصلي مواقف سخيفة بردوا مبفتكرش الحاجات دى أو مش فدماغى بصراحة ممكن يكون حصلى ونسيتها وممكن يكون محصليش أصلا بس هو بس موضوع العقبات والكلام دا هيتمثل فى الحقد والغل لو فى حد مش بيحبنى أو حد بيعمل نفس الحاجة اللى أنا بعملها مثلاً وشافنى أفضل منه فأكيد بيتربصلى إن يعملى مشاكل وكدا بس الحقيقة أنا مفيش موقف معين أنا فاكره.
_ طريق الشهرة والسوشال ميديا كان من ضمن خططك ولا هي جت صدفة؟
لا مكنش فى خططى ولا فكرتله ولا أى حاجة وجات بالصدفة مليون فى الـ ١٠٠ وبتوفيق ربنا سبحانه وتعالى .
_ لكل شخص مقبل علي تعلم اللغة الإنجليزية تنصحه ب إيه؟
هو أنا انصحه مش بس لو هو مقبل على تعمل الإنجلش دا هو لو مقبل على تعلم أى لغة تانية أو أى مهارة جديدة الموضوع كله فى الاستمرارية وإن الحاجة دى تكون من روتين يومه يعنى مثلاً أنت هتتعلم إنجلش خلاص وقررت إنك هتتعلم إنجلش خليه مثلاً ٣٠ دقيقة كل يوم بتسمع وبتردد زى البغبغان بالظبط اللى تسمعه ردده أسمع واتفرج على حاجات إنجلش ب إنجلش وبترجمة تحتها بالعربى تبقى أنت سامع وشايف والترجمه قدامك كل دا هيفرق معاك فى الإنجلش جامد ، اعمل دا ٣٠ دقيقة لمده ٣٠ يوم وشوف النتيجة فى أول شهر وبعد كدا جرب بعد شهرين وبعد تلت شهور هتلاقى الموضوع مختلف تماماً ، احفظ كلمات كتير خلى عندك حصيلة كلمات بتاعتك قوية جداً واعرف درس جرامر فى الأسبوع وطبق الكلمات اللى أنت حفظتها فى درس الجرامر دا صدقنى الموضوع دا سحر هيفرق معاك كتير جدا جدا .
_ إيه الأمور التي يجب تجنبها عند تعلم اللغة ؟
الأمور اللى ممكن نتجنبها وإحنا بنتعلم اللغة إن إحنا منحطش تارجت بعيد يعنى محطش وأنا لسه Beginner أحط تارجت إن أنا عايزه أتكلم إنجلش بطلاقه ، لا احط تارجت سهل achievable حاجه أقدر احققها تارجت بسيط احققه و أخد التارجت اللى بعده احققه و أطلع التارجت اللى بعده تانى حاجة تعدد المصادر يعنى ميبقاش فى مليون كتاب بذاكر منه هو كتاب واحد أخلصه أخش على اللى بعده لكن دا كتاب حلو جداً لـ مش عارف إيه ودا كتاب مش عارف إيه لا كتير المصادر الكتير والـ Materials الكتيره هتخليك تتوه ومتلغبط ومتتجهش إنك تتعلم من أكتر من مدرس .
_ لا سيما أن اللغة الإنجليزية أصبحت لغة العصر ، تنصح المعلمين اللي لسه بيستخدموا الطريقة التقليدية في تعلم اللغة إنهم يعملوا إيه مع الطلبة ، وإيه أهم المصادر اللي ترشحها ليهم تفيدهم في المستوي الأكاديمي ؟
طيب الحقيقة إن أنا مش مدرس أكاديمى فبالتالى معنديش upper hands على المدرسين الاكاديمين عشان أنا أنصحهم بالعكس كلهم مدرسين أفاضل وكلهم شاطرين جداً ولكن أنا مش مدرس أكاديمى ، أنا مدرس أعلم الشخص أنه يتكلم إنجلش مش إنه اشرحله إنجلش أو يجيب درجه نهائية فى الجرامر أو الإمتحانات أو الكلام دا كله فالمدرسين الأكاديمين ممكن أنصحهم نصيحة واحده إنهم يشوفوا طرق التدريس الجديدة والمنهجية الجديدة ويتابعوا ناس مختصين فى طرق التدريس والكلام دا لأن هيفرق معاهم كتير جداً ولكن فى الأول وفى الآخر أنا مش مدرس أكاديمى
_ أي accent حضرتك بتفضلها للمبتدئين في تعلم اللغة ، وإيه أهم المصادر اللي ممكن تفيدهم في تعلمها.
والله أنا بحب الـ American accent بحبها عن ظهر قلب ومش بس موضوع مبتدئين أو غيره أنا بحب الـ American accent بحب ادرسها مع إن أنا أعرف الـ British accent ولكن أنا بحب الـ American accent بس يعنى وإيه المصادر اللى ممكن تساعدهم فى تعملها إنهم يسمعو الـ American accent ب إنجلش suptitles ويقعدوا يرددوا دى أهم المصادر وكمان أنا عامل كورس خاص بـ American accent كامل يقدروا يتعلموا منه الـ American accent كاملة.
_ سلسلة مصطفي عاطف الشهيرة Grammar and Vocabulary book .
ممكن تشرح لنا أكتر عن السلسلة دي ومحتوياتها .
طيب هى السلسلة دى فيها تلت حاجات غير الكورسات يعنى أنا عندى أكتر من ١١ كورس لكن السلسة دى فيها كتاب جرامر باللغة العامية بشرح الجرامر باللغة العاميا وحاطت أكتر ١٠٠٠ كلمة حياتية بنستخدمهم وبشرح كل دروس الجرامر اللى الشخص محتجاهم عشان يتكلم إنجلش باللغة العامية
وكمان تمارين حياتية يعنى أنا بشرح فيها الإنجلش اليومى مش بشرح فيها إنجلش مدارس ولا أكاديمى وكدا كمان كل دا متسجل بصوتى وتقدروا تسمعوه .
أما بالنسبة لكتاب الـ vocab أشخاص تقولي عندى مشكلة إن هو مش عارف يحفظ كلمات كتير وكل ما يحفظ كلمات كتير ينساها وهكذا أنا عملت حاة إسمها vocaby دا متقسم لموضوعات حياتية كل حاجة حواليهم في أي مكان بالإنجلش وكمان في آخر الكتاب حطيت أهم ٢٠ مثل شعبى بالإنجلش.
آخر حاجة في السلسلة لعبة إسمها gramatic cards دى لعبة للأطفال إنهم يتعلموا يكونو جملة جرامر من خلال كروت والكروت دى smart جداً كل كارت واخد لون وكل ترتيب للألوان بيعمل زمن معين يعنى أحمر أخضر أزرق دا كدا present simple المضارع البسيط ، أحمر أخضر مثلاً دا present continuous مضارع مستمر وبيكون معاه بوكليت شرح علشان يشوفوا الشرح فى البوكليت ويقدروا يطبقوه على dashboard بتاعت اللعبة بس دى كدا السلسلة المتاحة حالياً.
_ لو حضرتك متاح ليك إنك تبقي مسؤول عن وضع أساسيات لتعلم اللغة ، إيه أهم الأساسيات اللي حضرتك هتحطها ؟
الأساسيات اللى أنا هحطها هو إن أنا هخلى ما هو أنا هحطها على أساس إيه احطها على أساس أكاديمى فأنا مش هحط حاجة لكن لو هحط أساس عشان الناس تتعلم تتكلم إنجلش فأنا هحطلهم vocab حياتى اللى هى كلمات حياتية بيقابلوها فى اليوم وهطبقلهم دا بقاعدة جرامر فاخليلهم ال structure ثابت مثلاً يعرفوا Structure معين فيعملوا منه كلمات معينة بشكل معين وبشكل سهل واخليهم يظبطوا الـ accent من خلال قواعد بسيطة كدا أنا كاتبها يعنى بس فهخليهم يعملوا كل دا بشكل يومى لمدة معينة ومدة قصيرة بس كدا ودا هينعكس عليهم بنتيجة حلوه جداً إن شاءالله وبعد كدا اخليهم بقي يعملوا practice للإنجلش اللى خدوه فبيكون الإنجلش بتاعهم شكله اتظبط كتير جداً .
_ في نهاية الحوار تتقدم رئاسة مجلس إدارة الجريدة والسادة الأعضاء بخالص الشكر لحضرتك علي هذا الحوار الرائع متمنين لكم دوام التوفيق والنجاح.
