أنباء اليوم في حوار خاص مع الفنان/ أحمد يونس وتفاصيل مشاركته مع الكينج ”محمد منير”

الفنان أحمد يونس ممثل مصري ولد في القاهرة وتحديداً في حي السيدة زينب . وكان الفنان محمد منير قد طرح مؤخرًا أغنية "للي"، وحقق من خلالها نجاحًا كبيرًا، ولفت أنظار الجمهور الفنان أحمد يونس، الذي ظهر خلال الفيديو كأنه منير في شبابه، حيث ظهر وهو يؤدي حركات الكينج بطريقة مماثلة تمامًا له، حاز من خلاله على إعجاب عدد كبير من الجمهور

بداية نرحب بحضرتك وسؤالنا الأول هو .

1-أهم الأعمال إللي شاركت فيها؟

أهلاً وسهلاً بكم وبكل المتابعين ، شاركت في كذا عمل منها. مسلسل منورة بأهلها، مسلسل وراء كل باب لحظة ضعف ، مسلسل القطة العمياء، مسلسل ضربة معلم، بالإضافة لأعمال تانية أخرهم كليب "للي " مع الكينج"محمد منير" .

2-أحب الأعمال إللي شاركت فيها لقلبك؟

بحب دوري في مسلسل منورة بأهلها بالرغم من أنه دور صغير جداً ، ودوري في مسلسل وش وظهر بطولة الفنان إياد نصار لأن المشهد اللي بيني وبينه هو اللي عرفني عليه . ومسرحية كهف رام .

3- ماذا عن أعمالك الفنية خلال الفترة القادمة؟

انتهيت من تصوير فيلم "مخ في الثلاجة" بطولة الفنانة "منة فضالي" والفنان "إبراهيم السمان" والفنان القدير الراحل"أحمد حلاوة" وتصوير المسلسل وقف سنة كاملة بسبب مرض الفنان أحمد حلاوة ووفاته وهيتم عرض الفيلم خلال الشهر القادم ، وحالياً بصور فيلم اسمه "بالطو" .

4- احكلنا تفاصيل المشاركة مع الكينج "محمد منير" وأكرم حسني؟

أنا كدة محتاج أسبوع علشان اتكلم عن المشاركة مع الكينج لأنه من أحب اللوكيشنات إللي دخلتها وقريبة لقلبي وأجواء الكواليس كانت مبهجة وجميلة جداً ، المخرجة مريم الباجوري دائماً بتدعمنا جداً، أكرم حسني طيب جداً ومرح ومحترم . الكليب اتصور في يومين واخر يوم تصوير كان يوم وقفة عيد الأضحى وزي ما شفنا حقق نجاح كبير جداً في مصر والوطن العربي وفي العالم كله ، في ناس كلمتني من أمريكا وباركتلي "الحمدلله على النجاح"

كليب "لّلي" من كلمات وألحان أكرم حسني، وتوزيع أمير محروس، والكليب من إخراج مريم الباجوري.

وجاءت كلمات الأغنية كالآتي: سألته هل داء الولع كان الجواب صدّه.. ساق الدلال ساق الدلع مفاتيح هواه صدّوا.. ومشيت أوشوش في الودع ولا جاني ليه ردّه.. اللي فتح باب الوجع واجب عليه ردّه.. يالا ويا لالا ويا لالا يالا ويالا للي.. يالا ويا لالا ويا لالا يالا ويالا لِلّي

5- كلمنا عن أزمة أغنية "للي"

أنا مش بحب أتكلم عن حاجة متخصنيش ، إذا كان في حاجة اتحذفت أو مسروقة كل دا بيخص الإنتاج والمؤلف والكاتب وطبعاً زي ما وضح الفنان أكرم حسني أنها أغنيته ومفيش لحن مسروق وإن اللحن من الفلكلور الشعبي أي حد ممكن يستخدمه وفي نجوم كتير غنوا الأغاني القديمة بطريقة تانية وكل اللي حصل ميأثرش على حاجة بالعكس من وجهة نظري دا ذكاء استخدام الفلكلور القديم وتحويله لحاجة جديدة يعتبر إحياء للتراث ، إيه المانع إننا نعمل كدة ، ومش حابب أخوض في الموضوع أكتر لأن زي ما قلت مش اختصاصي.

6-بعد المشاركة مع الكينج.. شفت ازاي رد فعل الناس أنك شبيه الكينج

أنا بعترض على وصفي بـ "شبيه الكينج محمد منير"، " بلاش شبيه لأن المعنى بيروح في حتة تانية خالص وبيضايقني لأن أنا مش شبيه حد .. بس في حاجة اسمها تجسيد شخصية مطلوبة مني".

أنا بجسد شخصية الكينج من صغري وروحي قريبة للكينج ومرتبطة ببه على الرغم إننا متقبلناش قبل كدة

بحب منير جداً وبقلده باستمرار، "طول عمري من صغري وأنا بحب اعمل كاراكتر منير، وكان أكبر دافع ليا، وكنت حاسس إن دي هتبقى بوابة لنجاحي في المستقبل، واشتغلت على ده كتير أوي والحمد لله الحلم اتحقق".

7- هطلب منك توجه رسالة هتكون لمين؟

رسالتي هتكون للمنتجين والمخرجين ، لما يكون حد عنده طموح وبيحاول وبيسعى ياريت تدعموه، ونغير نظرية إن اللي على الساحة هو بس يبقى موجود ، لأن في ناس بتظهر جديدة وعندها موهبة ، مش بتكلم عن نفسي بس بتكلم على قطاع كبير ، مفيش حد يعرف يتحكم في الموهبة . بالعكس ممكن تقضوا عليها ومفيش حد يشوفها ، فبتمني من المنتجين والمخرجين إنهم يهتموا بالمواهب لأن في مواهب كتير اوي مفيش حد يعرف عنها حاجة .

8- نفسك تشتغل مع مين ؟

على مستوى المخرجين، المخرج الكبير يسري نصر الله، والمخرج حسين المنباوي

على مستوى الممثلين، الفنان أحمد مكي ، الفنان كريم عبد العزيز، الفنان سيد رجب، الفنان أحمد عز .

9- شايف نفسك فين دلوقتي؟

بعتبر النجاح اللي حصل للكليب سلط الضوء عليا ودي انا بعتبرها خطوة البداية بعد ٥ سنين لأن النجاح لسه بدري عليه أوي ، بس أنا عندي إرادة وصبر واجتهاد مش بيخلص بفضل ربنا وكرمه .

وفي النهاية نشكر الفنان أحمد يونس على اللقاء الممتع متمنين له دوام النجاح والتوفيق.