قصة أصحاب السبت بقلم - رضا العزايزة
قال الإبن : بقولك إيه يا أمى كنت عايز اعرف منك قصة أصحاب السبت علشان أفهمها ببساطه منك
الأم: حاضر يا حبيبى هقولك القصه بكل بساطه
رد الولد: مين الناس اللى أتحولوا لقرود ومكانهم فين؟! وهما لسه موجودين اللى فى جنينة الحيوانات.......
ردت الأم: دول ناس من زمان قوى ياابنى خلاص ماتوا واسمع معايا الحكاية واحده واحده
رد الإبن: حاضر ياأمى
ردت الأم ضاحكة : القرود دول أقصد أصحاب السبت ناس عصوا ربهم علشان بطنهم شهوة البطن يا إبنى ممكن تخلى الناس اللى معندهاش إيمان تعصى ربهم
رد الولد : هما كانوا فين يا أمى أصحاب السبت ؟!
ردت الأم : كانوا فى قريه على البحر وبيشتغلوا صيادين يُقال فى زمن سيدنا داود
القريه إسمها "آيل " على البحر ربنا كان مخلى يوم الجمعه هو الأجازة
قالوا للنبى بتاعهم فى الوقت دة أن الأجازة تكون يوم السبت ...
... بعد كده الأجازة بتاعتهم خلاص بقت يوم السبت يسكتوا كده لا ميسكتوش هما اللى إختاروا اليوم
المهم الإختبار بتاعهم أنهم ينفذوا الأمر بعدم الصيد يوم السبت علشان هما صيادين طبعا كل اللى يهمهم الأسماك
رد الإبن : والسمك ياأمى كان كتير يوم السبت
وطول الأسبوع سمك أقل شويه من يوم السبت
قالت الأم: صح يا حبيبى بس دا كان أمتحان ليهم وعقاب برضوا هيسمعوا الكلام فى تحريم الصيد يوم السبت ولا لاء
رد الإبن : وحصل أيه بعد كده ياأمى؟
قالت الأم: الناس الملتزمة شموا ريحه سمك يوم الأحد قالوا الريحه دى جايه منين ومفيش صيد يوم السبت ولا أكل سمك
رد الإبن: وبعدين ياأمى طلع مين اللى بياكل سمك؟! وعملوا معاه ايه ؟!
قالت الأم: سألوا واحد منهم أنت بتعمل أيه بتصطاد يوم السبت قالهم لا دا جلد سمك قديم بشويه على النار
رد الإبن: أمى أنا مش بحب جلد السمك بياكلوا أزاى !!!
قالت الأم: ياابنى يا حبيبى بيكذب عليهم كان بيربط الشبكه يوم السبت بحبل ويثبتها بحجر وياخدها يوم الأحد يعنى بيتحايل على كسر العهد فى تحريم الصيد يوم السبت
وكتير عملوا زيه وقلدوه فى الصيد بالطريقه دى
رد الأبن : كلهم يا أمى عملوا زى الراجل ده؟!
قالت الأم: لا طبعا فى جزء من الناس نصحوهم علشان عقاب الله ...
وناس تانيه شافت وسكتت... بس الدين النصيحه
وناس تانيه خافوا ومشيوا من القرية خوفاً من نزول العقاب عليهم هما كمان عملوا سور بينهم وبين الناس اللى عصوا ربهم علشان بطنهم وسابوا المكان مع النبى علشان يبعدوا عنهم
قال الابن : وبعدين ياأمى بقوا قرود أزاى؟!
قالت الام : الناس المؤمنه بعد كام يوم من العذاب اللى حل على القريه الفاسقه الظالم أهلها
بصوا عليهم لقوهم قرود.....
أتحولوا لقرود وكانوا بيعيطوا كلهم وماتوا بعد كده
رد الإبن: كل دة يا أمى علشان ياكلوا سمك يوم الأجازة !!
قالت الأم: لا ياحبيي علشان عصوا ربنا وأستهانوا بأوامر الله عز وجل وعاندوا فحق عليهم العذاب
رد الإبن: الناس الصالحه هم والنبى اللى سمعوا أوامر الله عملوا أيه بعد كده؟
ردت الأم: قالوا الحمد لله أن إحنا سمعنا أوامر الله
ولم نستهين بالأمر وربنا رحمنا من العقاب العظيم وقاومنا شهوة البطن الشهوات كتير يا حبيبى منهم شهوة البطن ولازم تهذيب علشان نعرف المُجرم من المُصلح الطائع والعاصى عفا الله الجميع
