البيت الكبير .. رؤية للشاعر/ أشرف عبد الكريم

شال الحمام

هموم الدنيا عن صدري

حط الحمام في قلبي ونام

ومن يومها صبح إبني ..

ألعبه أناجيه وناغش فيه

ويزعل مني وأصالحه

حمام زغاليل بيدلع عليا كتير

منا أمه ..

يوماتي ألقاه

حزين باكي بيتشاكي

يقول يامه

جناحي قصير ونفسي أطير

واروح للسما العالي ..

وبره البيت هقف ع الحيط

بريشي هقوي منقاري ..

يابرج في السما عالي

وغازلة البرج بشباكك

يطير السرب قدامي

وييجي يحط على بابك ..

يزوم في المكان ويحم

ويشرب من أوانيكي

يحس إنك انتي الأم

وينسى الغربة في عنيكي ..

وانا شايل مراسيلي

بشاورلك بمنديلي

بنادي عليكي صبح وليل

يانوري وضي قناديلي ..

وهرجعلك يا ست الكل

يابيت دافي يساع الكل ..

ومهما ابعد أو اتغرب

حنينك ع الجبين بيطل ..

ومين غيرك هيحميني

ده بيتك غية للزغاليل

في عز البرد تاخديني

في حضن يشفي كل عليل ..

ومش هقدر على بعدك

ولا هقدر أعيش في الظل

ده بكرة أكيد هاكون جنبك

دنا سؤالك وإنتي الحل ..