أصل وصورة

الشاعر- اشرف عبد الكريم

تشبهني ولا انت معايا

ولا انت عايش جوايا

مبقتش قادر أفهمني

فيه شيئ مخيف ماشي ورايا ..

مين فينا أصل ومين صورة

مين خلى نفسنا مكسورة

مين فينا شر ومين الخير

دي حاجات وجوايا محفورة ..

خلتني زي البغبغان

تايه مابيني وبين روحي

مش فارقة مين فينا الغلطان

يانفسي ماتقولي وتبوحي ..

معقولة دي هتبقى نهايتي

بنهار ولازم أفوقني

واعرف أكون انا وانت مين

دي ملامحي ضاعت في مرايتي ..

أنا أبقى واحد ولا اتنين

واذا كنت أصل دي صورة مين

خيال مآتة ده ولا سراب

هو انا واخدني ورايح فين ..؟

هتحدي روحي واكون أقوى

ولا عمري هضعف ولا هرضى

إني ابقى مسجون جوايا

هخرج لدنيا تكون أحلى ..

ولا عمري تاني هخاف منك

مهما ظهرتلي بظلك

هكتب نهاية لأحزاني

وامسحني لو شوفتني جنبك ..

في الصورة هطلع أنا وحدي

وأزيل ملامحك من جنبي

وساعتها هعرف مين انا اكون

ووزن مابين عقلي وقلبي ..