صورة بهتانا ..

ساعات الناس بتنساني
مع إني ف الحياة عايش
بدور ع للي يهواني
وابص بعيني مش شايف
يكنش الناس مخصماني
وانا الغلطان ومش عارف ..

غريب الطبع ليه فينا
بنرسم صورة بهتانا
نطفي شموعنا بإدينا
ونكسر حاجة جوانا ..

وننسى ذكريات حلوة
نلوم بعضينا ع الفاضي
نخلي حياتنا ليه مرة
بسيرة وجرح ف الماضي ..

ياريت نقعد ونتكلم
ونسمع بعض ونصافح
نخلي قلوبنا تتعلم
ماتجرحش وتتسامح ..

ده صوتي لو أنين مجروح
هيوصل لو في سجن كبير
وقلمي لو بسره يبوح
هيكتب م القصص مواويل ..

دنا شاعر وكلماتي
ياريت الكل يقراها
حروفي وسط أبياتي
تهد جبال في معناها ..