أنباء اليوم في جلسة حوارية خاصة مع إسلام مسعد ومشاركته في مسابقة الدكتورة أمل جمال سليمان للفنانين المتطوعين
ضيفنا النهارده هو إسلام مسعد، فنان شامل ومتعدد المواهب ، في كل مجال هتلاقي ليه بصمة "بيقدم مونولوج و مسلسلات إذاعية ومقدم برامج بالإضافة لأعماله التطوعية ، هنتعرف عليه أكتر من خلال حوارنا معاه .
-في البداية بنرحب بيك وعرفنا بنفسك ؟
إسلام مسعد السعيد ، عندي ٣١ سنة ، اتخرجت من كلية التربية النوعية جامعة الفيوم ، قسم تكنولوجيا التعليم .
-كلمنا عن بدايتك؟
بمثل من وانا عندي ٩ سنين كنت في ابتدائي كنت بمثل وانا في المدرسة وانقطعت فترة الإعدادي والثانوي ولما دخلت المعهد بدأت ادخل اسكتشات كان موضوع التمثيل طاغي اكتر حتى لما دخلت الجامعة كانت كل الناس عارفة إسلام من ناحية المونولوج لاني كنت بطلع حفلات وكنت بسافر محافظات كتير جداً واعمل حفلات مونولوج ولكن في نطاق الجامعة كنت بمثل في كاست الكلية بتاعتي وكمان دخلت كاست الجامعة.
- امتى بدأت تقدم مونولوج" تقليد الشخصيات" و استاند اب كوميدي؟
من فترة كبيرة لما كنت في ثانوي وبعد كدة المعهد ثم الجامعة من أيام الثانوي بدأ الموضوع يظهر بشكل كبير بدأت اقلد شخصيات من وانا عندي ٩ سنين الفكرة كلها إن الموضوع تطور معايا وقت الثانوي كان في عدد شخصيات كتير، لعبت استاند اب كوميدي فترة الجامعة وبطلت مع نهاية الجامعة في ٢٠١٥ و كملت في كرير التمثيل وتقليد الشخصيات.
- مين اللي اكتشف إسلام مسعد؟
مسرح الجامعة ، انا مش هقول حد اكتشفني بعينه ولكن باجتهادي قدرت أظهر نفسي لكتير من الناس وكانت في فترة الجامعة وهى أهم فترة بالنسبالي وأحصل على مراكز في مجال المونولوج واشارك في مسرح الكلية ثم مسرح الجامعة ، ومن هنا بدأ إسلام يظهر للناس مش فكرة إن حد يكتشفه .
_مين أكثر الشخصيات اللي بتحب تقلدها؟
مفيش شخصية أنا بقلدها مش بحبها ، بس في ناس مميزة وبدأت بيها وبالتالي كانوا الأساس زي الفنان "محمد سعد" في شخصية اللمبي ، والرئيس الراحل "أنور السادات" ، وطبعاً الجميل الراحل الفنان "إسماعيل يس" دول أكتر ٣ شخصيات كنت بحب اقلدهم وما زلت
- مين اللي أطلق عليك لقب"الكينج الصغير" ؟
انا بعتز باللقب ده جدا، عملت حفلات في أماكن كتير جداً ولكن محافظة بني سويف كنت عملت فيها حفلات كتير، وفي حفلة من الحفلات لما سمعوا وانا بقلد محمد منير وطلبوا مني اغني محمد منير أكتر وبعد الحفلة في ناس اتصورت معايا ونزلوا الصور ولقيت أكتر من حد كاتب هاشتاج "الكينج الصغير" وعجبني الموضوع جداً وبعد كدة لما بقيت اروح بني سويف بلاقيهم كاتبين على البوستر "الكينج الصغير" ودي كانت الحاجة الجميلة اللى حصلت وبعد كدة انتشرت والناس عرفت إن إسلام مسعد لقبه "الكينج الصغير" .
- هل اتعرض عليك اي أعمال فنية في التليفزيون أو المسرح؟
اتعرض عليا أكثر من فرصة في المسرح ومع فنانين إضافة ليا من ضمنهم الفنانة القديرة وفاء الحكيم ولكن لظروف معينة للأسف لم يحالفني الحظ اني ابقى موجود فيها، وحالياً بعمل مسلسل إذاعي مع الفنان سامح حسين، ودة يعتبر تالت مسلسل مع الفنان سامح حسين والفنانة مي كساب والفنانة سلوى عثمان والفنان محمد عبد الجواد ودي الحاجة اللى شغال بقالي فترة عليها ومازالت مستمر فيها.
- كلمنا عن البرنامج الإذاعي "كوكب مسعد"؟ وازاي جتلك فكرته؟
بالنسبة "كوكب مسعد" هو برنامج الإذاعي يذاع علي راديو عين شمس وهو الراديو الرسمي لجامعة عين شمس، والفكرة جاتلي إني أنا شفت كتير جداً من المواهب أياً كانت ممثلين أو مغنين مش عليهم الضوء في حين إن في ناس بتتشهر وهما مش عندهم موهبة دة اللى حفزني شوية إني اعمل برنامج متعلق باني أظهر المواهب وفي نفس الوقت استضيف نجوم كبار ومشاهير سوشيال ميديا وطبعاً لأن في ناس كتيرة بتابعهم فحبيت اعمل حاجة زي كدة اللي هى فكرة البرنامج وطبعاً مسعد من اسمي وكوكب فضلت إني أكون في مكان تاني خالص غير كوكب الأرض أنا هعمل كوكب ملوش علاقة بكوكب الأرض خالص هو كوكب خاص بالمواهب والمشاهير فعلشان كدة جت فكرة كوكب مسعد وإن احنا نقدم حاجة مختلفة وبسيطة للناس.
- هل قدمت برامج إذاعية أخرى؟
قدمت أكتر من برنامج إذاعي من ضمنهم "على الصبح بدري" مع زميلتي "ميرنا ماهر"
و "صباحك شمس" مع زميلتي"امل هلال" والاثين برامج اجتماعية خفيفة بنصبح بيها على الناس الصبح والموضوع لطيف.
و برنامج "كلاشيه" مع زميلتي "أمل هلال" بنقدم فيه الكلاشيهات اللى بتحصل في حياتنا كلها زي الجواز والسفر ومواقف كتير مختلفة، كل حلقة بنجمع مجموعة كلاشيهات عن موقف معين.
و برنامج "بلاي ليست" مع زميلتي "بسملة هشام" هو برنامج غنائي وكل حلقة بيكون في بلاي ليست لمطرب أو مطربة أو الحلقة بتكون متنوعة.
وبرنامج" الكمين" مع زميلتي" رحمة منصور" برنامج فني لأكتشاف المواهب. وكلهم كانوا علي راديو عين شمس.
وبرنامج" أنا والمشخصاتي" كان علي راديو 6 عجب.
-ما هي الجوائز التي حصلت عليها في هذا المجال؟
بالنسبة للجوائز الحمدلله رب العالمين في جوايز كتير اتكرمت بيها في مجال الاستاند اب كوميدي والمونولوج والتمثيل كمان كان أغلبها في فترة الجامعة ، أخدت مركز أول على مستوى الجامعة لمدة ٤ سنين في مجال المونولوج أو الاستاند اب كوميدي، أخدت جائزة أفضل ممثل على مستوى الجامعة وكنت في سنة تانية ودي من التكريمات اللى بجد مبسوط بيها، واتكرمت من جامعات كتير في حفلات، ومؤخراً أخدت المركز الأول في الاستاند اب كوميدي على مستوى الوطن العربي في جائزة الدكتورة أمل جمال سليمان للفنانين المتطوعين والجائزة أثرت معايا جداً لأنها مهمة بالنسبالي وجت في وقت مهم وجائزة مهمة لأنها على نطاق مستوى الوطن العربي مش مصر بس أو محافظة معينة وكان معايا مشاركين من "المغرب ،تونس ،السودان ،سوريا،السعودية " فكان في مشاركات كتير جدا، واخدت مركز ثالث عام على مستوى المسابقة كلها في كل المجالات في مسابقة الدكتورة أمل جمال سليمان للفنانين المتطوعين.
-هل اشتركت في أي مسابقات أو مهرجان ثقافية ؟
اشتركت في حاجات كتير جداً أهمهم مسابقة إبداع اللى بتعملها وزارة الشباب والرياضة لمدة ٤ مواسم في مجال المسرح والاستاند اب كوميدي وحاجات تانية كتير، ومسابقة الطالب والطالبة المثاليين على مستوى جامعة الفيوم واخدت الطالب المثالي على مستوى الكلية وفي تصفيات الجامعة للأسف محالفنيش الحظ اني أكون على مستوى الجامعة كلها، وآخرهم جائزة الدكتورة أمل جمال سليمان للفنانين المتطوعين ، ومهرجانات كتير على مستوى الجامعات المختلفة.
-كلمنا عن فكرة مسابقة د/ أمل جمال الفنانيين المتطوعين ؟
بالنسبة لجائزة الدكتورة أمل جمال سليمان كانت مسابقة عبارة عن مجموعة من المجالات حوالي ٧ مجالات فكرة المسابقة بتدعم كل من هو متطوع أو ليه عمل تطوعي وفي نفس الوقت عنده موهبة هما حبوا يدعموا المتطوعين اللى عندهم مواهب وبيحصل ندوات ومحاضرات مفيدة جداً لأي حد بيشتغل في العمل التطوعي، كمان المتسابق بيشارك بالعمل التطوعي اللى عمله وبيحصل تصفيات في كل مجال من خلال الموهبة أو العمل اللى هيتم تقديمه، أول حاجة بيتم الفلترة على الموهبة نفسها وبعد كدة بتقدم مشروع أو فكرة مشروع تطوعي بيتم تنفيذه وبيتم التصفية عليه، وبعد أول مرة أخدت المركز الأول في الاستاند اب كوميدي وحصلت تصفية للمرحلة الثانية اللى هما الاوائل في كل المجالات من هنا بدأ كل متسابق يقدم الفكرة اللى عايز يعملها وبعد كدة تم التصفية النهائية وتم الإعلان عن الفائزين في المسابقة.
-ازاي جتلك فكرة الاشتراك في المسابقة ؟
الفكرة لأن من وأنا في الجامعة بحب العمل التطوعي، ودة كان أكبر حافز إني أقدم في المسابقة ولقيت الإعلان موجود على منصة البورد العربي وهى من المنصات الداعمة للشباب والسبب التاني علاقتي بالدكتور أمل جمال سليمان تعتبر أم وداعمة لشباب كتير جداً فلقيت المسابقة معروضة ومن ضمنها الاستاند اب كوميدي فقدمت وكانت مسابقة المركز الأول ١٠٠٠ دولار والمركز الثاني والثالث بياخدوا شهادات على مستوى الوطن العربي وحاجة كويسة جداً إن الواحد يقدم فيها مش علشان الجزء المادي، والأهم إني هتعرف على ناس متطوعين على مستوى الوطن العربي ومن الاستفادات اللى طلعنا بيها من المسابقة عرفنا ناس من دول تانية كتير وكنا بنتناقش ونتكلم والموضوع كان في دعم مادي ومعنوي بالإضافة إلى الإنفتاح على عالم معين هيفدنا في اختلاف الثقافات.
- احكلنا التفاصيل من أول ما قدمت لحد إعلان النتيجة؟
انا قدمت وبعد كدة فضلنا فترة كبيرة "شهور" وبعد كدة بعتولي ايميل وبلغوني اني اتاهلت للمرحلة الثانية وهنا كان لازم كل متسابق يقدم الفكرة اللى هيشارك بيها ، وحبيت إني أكون خارج الصندوق وعملت فيديو بيتكلم على أعمالي التطوعية وفي آخر الفيديو كنت بتكلم على فكرتي في العمل التطوعي وبعد كدة انتظرنا فترة ثم تم الإعلان عن الحفل الختامي، والحفل الختامي عبارة عن عرض ماتم بشكل عام في المسابقة ونتائج التصفيات واتكلموا عن المتسابقين اللى وصلوا للنهائيات، وبعد كدة عرضوا فيديو لأوائل كل المجالات اللى اتقدم عليها وفي نهاية الفيديو تم عرض الثلاثة الفائزين على مستوى الوطن العربي واللى اتشرفت جداً إني حصلت على المركز الثالث على مستوى الوطن العربي في مسابقة الدكتورة أمل جمال سليمان للفنانين المتطوعين
- قدمت ايه في المسابقة بالنسبة لمجال الاستاند آب كوميدي و مجال العمل التطوعي؟
في البداية خالص اول ما قدمت في المسابقة بعت فيديو فيه عمل فني كمونولوج، الحمدلله أخدت المركز الأول في الاستاند آب كوميدي، أما بالنسبة لمشروع العمل التطوعي، هو فكرة المشروع" الموهوبين من أطفال الشوارع"، أنا بشوف أطفال الشوارع بشكل كبير جداً، وبلاقي إن فيهم أطفال كتير جداً عندهم الموهبة، الموهبة دي مش شرط يكون بيغني، ومش شرط يكون بيقول شعر، في مواهب كتيرة جداً في أطفال الشوارع، أيه المانع إني يكون في مؤسسة بتدعم الموهوبين من أطفال الشوارع، هيكون ليها أهداف ونتائج ، أولهم إننا بنحد من أطفال الشوارع، بنميهم بشكل صح، بنطورهم بشكل أفضل من حيث الثقافة والتربية والنشأة عموماً، أو بنغير من السلوك السئ إلى السلوك الأفضل، بنشتغل على الموهبة بنوفرلهم بيئة أفضل، بنشتغل على موهبة كل واحد من الأطفال دي لأني مؤمن إن كل واحد عنده موهبة، فأكيد أطفال الشوارع دول بدل ما هما بيناموا في الشارع وبيتعاملوا بشكل سئ وسلوكهم بيكون سئ جداً وبيأثر على المجتمع، الفكرة إننا نجمع أطفال الشوارع ونشتغل عليهم ويكونوا أفضل هما مش أقل من أي حد، حصلت ظروف وصلتهم للشارع احنا هنكسر الظروف دي وهنرجعهم تاني للطريق الصح ونغير سلوكهم للأفضل، وهي دي فكرة مشروعي إني اعمل مؤسسة بتؤهل الموهوبين من أطفال الشوارع.
-شايف نفسك هتكون ازاي الفترة الجاية؟
دايماً بحب أكون طموح وبعمل لنفسي تارجت وبسعي إني أوصلها والحمدلله ربنا كريم جداً معايا ،وقدرت أوصل لحاجات كتيرة مكنتش احلم إن أنا أوصلها ممكن متبقاش مبهرة لناس كتير ولكن أنا بحس بيها أكتر لأني تعبت وعافرت ، فلما بتوصل لحاجة أنت تعبت وعافرت ليها بتحس بقيمتها ، وشايف نفسي هكون من الناس اللى بتقدم أعمال فنية في الميديا بشكل كويس ، ودي من الحاجات اللي شايف نفسي موجود فيها .
-إيه اللي إسلام لسه عايز يحققه ويوصله ؟
أنا نفسي جداً أكون ممثل محبوب ، ومش لازم أكون مشهور ، هو طبعاً الشهرة حاجة كويسة ولكنها سلاح ذو حدين ، نفسي أكون الممثل اللى بيتم ذكره بشكل دائم بسمعة طيبة ، زي إسماعيل يس احنا لحد دلوقتي حتى الأجيال الجديدة كمان ، اسماعيل يس مازال موجود ونجيب الريحاني مازال موجود ، ممثلين كتير جداً أعمالهم كانت قوية ولكن منسيين إلى حد ما ، لكن أنا من الناس اللى بعتز بيهم إسماعيل يس ، وعلشان كدة نفسي أكون جزء من إسماعيل يس في نقطة إني ممثل محبوب ، أو ممكن تكون مشهور ، مش عندي مشكلة في الشهرة ، ولكن الأفضل إنك تكون شخص مؤثر ومحبوب من الناس .
الفنان إسلام مسعد تشرفنا بحوارنا معاك وفي إنتظار أعمالك الفنية القادمة .
