الشاعر أشرف عبد الكريم / يكتب .. جواز صالونات

ومين قال ان انا ماشي
انا قاعد على قلبك
انا ركبت خلاص راسي
حلفت وربنا ما سايبك ..

ماعداش ع الجواز شهرين
بسرعة ظهرتي على طبعك
خدعتيني بنظرة عين
ومش لاقي اللي يشفعلك .

بقيتي علامة تجارية
في هد البيت على اصحابه
ويوم مانهي العلاقة دية
رح أدبح عجل على بابه ..

ووزع ع الجيران شربات
واقول كان هم عدى وفات ..

ياريتني سمعت أصحابي
ده ياما نصحوني بالساعات
قالولي بلاش تكون قاضي
وتحكم في جواز صالونات ..

وفي الاخر انا الغلطان
أنا اللي جنيت على نفسي
بعود كبريت مالوهش امان
ومين هايعني في مصيبتي ..

ودلوقتي بلوم نفسي
انا القاتل انا الجاني
عزلت مشاعري عن جسمي
بقيت فجأة واحد تاني ..

قتلتك وسط كل الناس
بقيتي عبرة في زماني
يا دايسا ع القلوب بمداس
وزرعة الشوك في بستاني ..

ولو رجع الزمان بيا
وخياروني من تاني
هجيب بفلوسي عربية
وادور على اللي يهواني ..

بلاها جواز بلا نيلة
وإيه خدنا من الجوازات
ده نكد الواحدة في الليلة
بقى هواية لدى الستات ..

وعشان معايا ألف دليل
هحط القاضي في مكاني
واقوله دي قضية جيل
ومش محتاجة لمحامي ..