عادل محمود يكتب : ”الست المصرية الأصيلة”
الست المصرية الأصيلة الطيبة الجميلة إللي كانت بتصحى الصبح بدري تصلي الصبح وتصحي عيالها يصلو وتفطرهم ، الست المصرية الأصيلة إللى كانت بتربي طيور فى بيتها وما تعرفش طريق الجزارين ،
الست المصرية إللي كانت تشيل قفة القمح أو الذرة على رأسها وتمشى بيها لحد الطاحونة وترجع بيها شايلاها وتخبزها عيش فلاحي صحي لبيتها وما تعرفش طريق المخابز .
الست المصرية الأصيلة كانت بتشمر هدومها وتنزل الغيط جنب جوزها تشتغل إيدها قبل إيده .
الست المصرية الطيبة بتاعت زمان كانت تقول جوزي هو سندي وعزوتي وعمري ما أصغره ولا اقعده قدام أهلي واغلطه فى يوم من الأيام .
لو قعدنا نحكي ونقول في الست المصرية بتاعت زمان عمرنا ما نقدر نوصفها ولا نوافيها حقوقها أبداً .
ياريت الجمعيات النسائية وبتوع الحريات وكل المسلطين والمأجورين لهدم المجتمع المصرية يتركو الست المصرية فى حالها وسيبوها تأدي رسالتها التربوية فى بيتها زي زمان ، علشان تطلع جيل عظيم زى الشعراوي وزويل ومجدي يعقوب ومصطفى محمود وغيرهم مع حفظ الألقاب ووافر الإحترام والتقدير . كفاية علينا اللي أخدناه من جيل الحريات ، كفاية أطفال مشردين بين أهليهم كفاية قضايا ، كفاية تفكك ، الله يهديكم ، انام اسأتم للست المصرية بظواهر كاذبة اقنعتوها بها وسلبتوها أنوثتها لما خلتوها تقف تزعق فى المحاكم وفى الفضائيات وكانت النتيجة هي الواقع المأسوى إللي وصلنا ليه في معدلات الطلاق والتحرش والتشرد والإدمان لأن الست المصرية هيا عمود البيت ، هيا الأساس إللي شايل البيت لو الأساس مال البيت كله لازم يطربق فوق رأس إللي فيه .
