قصيدة / دكان حياتي

للشاعر أشرف عبدالكريم
عيني على واحد
فتح قلبه لكل الناس ..
كان عايش يوم لنفسه
ويومين لكل الناس ..
وف يوم لقى نفسه
تايه في وسط الناس ..
لقى الأصيل واحد
وكتير بدون احساس ..
قام قافل على نفسه
وحلف مايعرف ناس ..
ودي قصتي أنا !
مانا واحد من الناس ..
********
دكان حياتي انا سكرته
بالشمع الاحمر وقفلته
وحلفت تاني ماهعرف حد
حتى حبيبي اللي عشقته ..
غيرت احلامي بايدي
ومعادش في حد حبيبي
حتى أعز الناس لية
مبقاش دوايا ولا طبيبي ..
يادنيا ايه اللي جرالك
سايقة الخلق على مزاجك
بايعة الفرح لكل الناس
وانا اللي توهت في أحزانك ..
بعد ماكانو حواليا
الدنيا صغرت في عنيا
أنا اللي عشت لكل الناس
دلوقتي عايش وحديا ..
أوعو تقولو أن أنا مسطول
أو اني بحكي كلام ف سطور
دنا اللي كنت ضحية ناس
وانتو اللي بكرة عليكو الدور ..
يارب اغفرلي ذنوبي
خليني أخرج من توبي
اصلي وأصوم واذكي
ويكون ده قدري ومكتوبي ..
***********