صورة اليوم : ”شجرة موسى”

الشجرة اللي كلم ربنا سبحانه و تعالي عندها سيدنا موسي
و موجودة في دير سانت كاترين بجنوب سيناء
الشجرة دي معجزة ربانية و قصتها ربنا ذكرها لنا في القرآن ان سيدنا موسي كان مع اهله في المنطقة دي و المكان ده من اشد المناطق برودة فرأي نار فقال لاهله انه حيروح ناحية النار و يحاول يجيب منها جذوة عشان يدفوا منها ولما وصل لقي الشجرة مشتعلة

لكن سبحان الله الشجرة كانت مشتعلة لكن من غير ما تحترق و بنفس خضرتها و هنا سمع سيدنا موسي الله سبحانه و تعالي يقول له يا موسي اخلع نعليك انك بالوادي المقدس طوي الي باقي القصة المعروفة

دي حكاية الشجرة بس حكايتها لسه منتهتش ، الشجرة دي للي فعلا لسه عاوز يشوف معجزات ملموسة لسه موجودة علي الارض

الشجرة معجزة بكل المقاييس و معجزتها في انها فريدة من نوعها في العالم و كتير حاولوا ياخدوا اجزاء منها و يزرعوها في اماكن تانية في العالم لكن مفيش فايدة محدش قدر ينجح في زراعتها

كمان الشجرة خضراء طول السنة و بلا ثمار و محدش عارف ازاي محافظة علي نفسها كده من الاف السنين