فاطمة عبدالواسع تكتب : الايام دوارة

مسيرنا نشوف ونفتكر الي حصل

بتثبت كل يوم إن العيب ع الي غفر

نسي وساب حقه وقلبه الي انفطر

اخدت منا الأيام كتير ومسيرها
تجيبه بنفس المصير

أصل يوم ليك ويوم عليك مش مجرد كلمتين

يتقالوا وقت غضب ويمر المر

أخدنا يومنا وجه علينا يومنا بالأنين

ومستحملين ومنتظرين نشوف الي جرحونا وهو بيمر عليهم نفس المصير

حلو الألم حلو الأنين مش هو ده الي فرحتوا بيه لينا من سنين

مش هو ده كان هدفكم الي شاغل ليلكم نهاركم

طعمه حلو ولا طعم سعادتكم فينا احلي

لما كنا فاكرين اننا منكم وجرينا عليكم في المحنة 
فرحتوا فينا واتشفيتم واتاري أنتم أصحاب الصدمة

اتعبوا واتألموا يمكن تتعلموا إن صبر المظلوم مش ضعف

ده دعي وأمل في انكم تدوقوا نفس الطعم

كنا بنقول هانت وفعلا هانت لما شوفنا أكل السحت في وشوشكم

لما شوفنا الضلمة في بيوتكم

لما شوفنا شرابكم من نفس الكاس

ماهو ربك مارضاش ع نفسه بالظلم ازاي هيرضاه ع الناس