نصائح ذهبية لحواء

للتخلّص من بقعة الزيت على الملابس.. حطّي كمية من بودرة التلك بسرعة عنصائحلى مكان البقعة، وسيبيها طول الليل لغاية ما البودرة تمتص الزيت، وبعد كده نفضيها من البودرة واغسليها بطريقتك العادية.

لتنظيف الأرضيات والأسطح عند سقوط الزيت عليها.. رشّي على مكان الزيت شوية بودرة تلك أو دقيق أو نشا، وسيبيه شوية لغاية ما البودرة تمتص الزيت، وبعد كده شيلي البودرة بالمكنسة أو بفوطة جافة، وامسحي مكان الزيت بالميه.

علشان تدخلي الخيط في إبرة الخياطة بسهولة.. اغمسي طرف الخيط في مُلمع الأظافر بتاعك، وبكده هتلاقيه بقى ناشف وتقدري تُلضميه في الإبرة بسهولة.

للحفاظ على جواربك الخفيفة أطول وقت.. اشطفيها بالماء البارد وهي جديدة، وبعد كده حُطّيها في الثلاجة لمدة ساعة أو ساعتين، وبكده تعيش معاكِ لوقت أطول من غير ما تتقطع.

لتنظيف فرش الماكياج.. انقعيها في خليط مكوّن من 3/ 4 كوب ميه، و1/ 4 كوب خل، واتركيها لمدة ساعتين، وبعد كده اشطفيها ونشّفيها جيداً.

لتنظيف الفرن من بواقي الطعام والدهون.. ضعى إناء فيه كوب مياه مغلية، وضعيها فى الفرن فى درجة حرارة مناسبة، واتركى المياه تكمّل غليانها داخل الفرن لعدة دقائق ؛ لأن البخار الخارج يساعد في إذابة بقايا الطعام والدهون، ثم بعد ذلك امسحي الفرن بقطعة قماش مغموسة في الخل.

لو في نمل في البيت.. اخلطي خل التفاح مع قليل من الماء ، ورشّيه في الأماكن التى يتجمع فيها النمل عندك في البيت.

للتخلّص من بُقع الحبر على الملابس.. ضعي على مكان البُقعة عصير ليمون أو خل، وافركيها كويس لغاية ما البُقعة تختفي، وبعد كده اغسليها بطريقتك العادية.

للتخلص من آثار احتراق الطعام في الأواني.. ضعي شوية مياه في الإناء مع بصلة سليمة، وحُطّيهم على النار وسيبيهم يغلوا مع بعض ، وبكده هتقدري تنظّفي آثار الاحتراق في الإناء بسهولة.

لمعرفة البيض الطازج من الفاسد.. حطّي البيض في الميه ، لو لقيتي إنها سقطت في الميه بشكل أفقي ، يبقى البيض ده طازج ، ولو البيض سقط بشكل مائل، يبقى عمره من 3 : 4 أيام، ولو سقطت بشكل عمودي يبقى عمرها 10 أيام، أما بقى لو البيض طفى على سطح الميه يبقى فاسد.

لو الأكل اتحرق منك.. ارفعي الحلة من على النار، وحطّيها في حلة أكبر تكون فيها مية باردة؛ علشان تمنعي طعم وريحة الشياط من إنه يتنقل لباقي الأكل، وبعد كده انقلي الأكل السليم في حلة تانية وحطّيه على النار لغاية ما يستوي.

لتنظيف الفضيات.. ممكن تستخدمي الميه اللي سلقتي فيها البطاطا أو البطاطس بالقشرة بتاعتها، والطريقة دي بتساعدك في إزالة الطبقة السوداء اللي بتكون على الملاعق أو الشوك الفضة.

لو عايزة تعرفي البيكينج باودر مُنتهي الصلاحية ولّا لأ.. حطّي ملعقة منه في كوب ميه لو حصل فوران يبقى البيكينج بودر ده سليم، أما بقى لو ماحصلش تفاعل أو فوران يبقى مُنتهي الصلاحية.

لو بتعاني من عسر الهضم.. ضيفي ملعقة كبيرة من خل التفاح على نصف كوب من النعناع المنقوع في الماء، وتناوليه بعد الأكل على طول.

لو الحذاء ضيّق عليك .. ادعكي المنطقة اللي بتضغط على رجلك من جوه بالصابون المبشور.

لتنظيف المرايات.. استخدمي البنطلونات الجينز القديمة، وقصّيها على شكل فوط صغيرة؛ لأن الجينز بينضف المرايات، ومش بيترك وبر عليها زي الأقمشة التانية.

لترطيب البشرة.. اشربي كل يوم من لترين إلى ثلاثة لترات من الميه والأعشاب، والطريقة دي هي أفضل مرطب للبشرة، وكمان بتنقي الجسم من السموم.

للتخلّص من بقعة مستحضرات التجميل على الملابس.. رشّي مكان البقعة قبل ما تغسليها بمنظف الزجاج، وبعد كده ادعكيها مكان البقعة بفرشة السجاد، ونشّفيها بفوطة صغيرة.

للتخلّص من رائحة الثوم.. افركي إيديك ببواقي البن اللي بتتبقى بعد ما تشربي فنجان القهوة، ولو بتعاني من رائحة الثوم في الفم امضغي بعض عيدان البقدونس .