الصدمة (خواطر) بقلم - فاطمة عبدالواسع

الصدمة منك انت بالذات مش متوقعة.

لأن انت الي كنت زمان بتطبطب ع الوجع .

تكون انت سببه وتزيد الألم .

فكنت خليك في مكانك من غير قرب .

ولا انت بتحب تجي وع الجرح تصب.

تصب مية نار وتدَّعي أنه الدوا .

وتدمع دمعتين وتكذب في كلمتين .

وتسند نفسك وتدعي التعب.

التعب لو كان نصيبك ده من ظلمك وتعذيبك .

تعذيبك بالفراق والقرب واللعب بمشاعر حبيبك .

إللي للأسف خلي نفسه في إيدك ماريونت.

وتحرك فيه وتستهتر وتشد.

كان مفكرك قريب قوي ورخى الحبل قوي.

ووثق فيك بالقوي وسلملك خيوط حياته

وعرف معاك الحب وآهاته.

وصدق حكاياتك وعاش ابتسامتك

ومد إيده ليك وسمع كلامك .

تيجي في الاخر تقول مضغوط

ياسيدي كفاية تشتكي وتعلق خيبتك على الضغوط.

ارتاح واسكت بقي واعترف إنك مش قدها .

قدها الكلمة اللي زمان وعدتها .

وانك كحيان اه كحيان وكلامك زي اللبان .

يتمضغ شوية حلو في ساعتها

ويترمي في دقايق أصل الأماني المغشوشة

مالهاش في قاموس الحقيقة خانة .

لأنها مجرد آماني وكلام مزيف في رواية.

من خيال مؤلف وأخرتها سطور وتلاقي النهاية..........