الشاعر أشرف عبد الكريم يكتب: عاملة بريئة
وليه مش عايزة تعتذري
ولا تقولي أنا أسفة
مش انتي البادية في جرحي
وعاملة بريئة منكسرة ..!
وغاوية تلوعي في مشاعرك
ورامية مشاعري ورا ضهرك
وعايشة في دور ماهوش دورك
وقال يعني مفيش زيك .
لكن والله دي غلطة
أنا اللي جريت ورا الأوهام
وجيتي في سكتي صدفة
ودة قدري مع الأيام ..
ومش هسمح اكون مظلوم
وفجأة أكون انا الجاني
انا مابعرفش ألف وادور
أنا صادق في أقوالي ..
عملتك نجمة في سمايا
ووردة ساكنة بستاني
رسمتك صورة في مرايا
وفضلت عايشة في خيالي ..
وكان أملي أكون ليكي
وارمي مشاعري ف إديكي
لكن انتي اللي مقدرتيش
تحسي بنبضي جواكي ..
بلاش نضحك على بعض
وتعملي فيها عشقاني
ده ميت مرة خلفتي الوعد
وكدبك هو اللي صحاني ..
وفوقت وتوبت من حبك
كويت جرحي وقلت خلاص
هاكون واحد غريب عندك
وهمسح صفحة الإخلاص .
وده جزائي ان كنت طبيب
في حب من طرف واحد
لنا قدرت اني ابقى قريب
ولا حتى أكون صاحب ..
