حوار خاص وشيق مع ” سلمى وليد ” الموديل الجميلة التي تحاول دائما النجاح و الصعود للمراكز الأولى في أعمالها

س : في البدايه عرفينا بنفسك؟؟
ج : اسمي " سلمى وليد " عندي 20 سنه اتولدت في جنوب سيناء وعايشه في الزقازيق بقالي 4 سنين .

س : كلمينا اكتر عن حياتك؟؟
ج : حياتي عاديه مفيهاش اي حاجه مختلفه عن أي حد ثانويه عامه جبت فيها 70% ومكنتش متأثره بصراحه لأن ساعتها شغلي على الانستا ابتدى يزيد ومحدش بيعرف يبقى معاه كل حاجه يا اما كنت هركز في الدراسه أو الشغل وانا حاولت أركز في الاتنين كانت النتيجه مش بطاله و دخلت حقوق وبحاول اخس عشان ابدع في شغلي و في ستايلي اكتر ويبقى عندي ثقه اكتر بنفسي .

س : بدأتي ازاي في المجال ده ومين شجعك انك تكملي؟؟
ج : انا أول البدايه كنت بتصور عادي وكانت صفحات الاونلاين بتاعت الميك اب بتاخدها وتقول إن الحاجات اللي استخدمتها عندهم مره في مره لقيت صفحه بتكلمني عشان تبعتلي حاجات أتصور بيها واعمل فيد باك عنها وابتديت شوية شوية اتعرف وابدأ اتعلم اكتر في الميك اب واحبه زياده بصراحه وكان في الأول عندي كام حاجه بسيطه كده و دلوقتي بحاول اتعلم اكتر وابقى احسن لحد اما اوصل اني اكون موديل ميك أب وكمان اعرف احطه بإحتراف لحد اللحظه دي انا موصلتش للنقطه اللي انا عايزها يمكن كذا مره كنت بيأس بس فيه شخص واحد بس هو اللي لحد دلوقتي بيشجعني عشان اتعلم اكتر ومكسلش لأني بطبيعتي كسوله جدا و طبعا مش هقولك كم المشاكل اللي بتحصل بسبب الناس اللي بتنصب بإسمي وتاخد هدايا وحاجات غريبه بصراحه.

س : اي اكتر موقف مؤثر في حياتك؟؟
ج : اكتر موقف مؤثر في حياتي مش عايزه اتكلم عنه بصراحه .

س : اي الحاجه اللي لو رجع بيكي الزمن هتعمليها؟؟ وايه الحاجه اللي مش هتعمليها؟؟
ج : الحاجه اللي هعملها اني كنت هحاول اكتر اوصل للحلجه اللي نفسي فيها واعملها وكنت هسافر ومخوفش نفسي في إني أكون في مكان لوحدي .
الحاجه اللي مش هعملها اني مقفلش على نفسي وعلى علاقاتي زياده عن اللزوم ومتعاملش مع حد عشان ده بيأثر عليا حاليا وبقيت انطوائيه اكتر .

س : هل اهلك كانوا موافقين على دخولك المجال ده ولا لاء؟؟
ج : الفكره الأول مكنش فيها ازمه من ناحية اهلي انا كنت عادي عندي اكونت بنزل صور وابتدى الموضوع واحده واحده وأول هديه جاتلي في حياتي لسه عندي لحد دلوقتي " سيت روج صغيره اوي فيها 4 ألوان" وابتدى شغلي يزيد والتعرف اكتر و ماما كانت بتشجعني ساعات وساعات تانيه كان خوفهم عليا كأم وأب بيزيد وكانت بتقلب بمشاكل بس هما دلوقتي عارفين اني بحب الحاجه دي و إن شاء الله هكون محققه اللي عايزاه قريب .

س : اي ردود أفعال اهلك والناس على شغلك؟؟
ج : ردود أفعال الناس في الأول مكانتش لطيفه ولا حاليا كلها لطيفه بردو الاستظراف اللي في الشارع زي.. دي وحشه وقصيره مش زي الصور وهي الميك اب بتاعها عامل ليه كده وكلام غريب وكانت ساعات بتضايقني لكن حاليا لما لقيت ان كل اللي كان ضدي زمان بيحاول دلوقتي يكون زيي أو يجي يسألني في حاجات بقيت بحس اني ابتديت فعلا امشي صح في الطريق اللي انا عايزاه.
ردود أفعال اهلي انهم فرحانين اني ينجح في حاجه معينه واكيد بردو بيقلقوا عليا .

س : اي الهدف أو الفكره اللي عايزه توصليها من خلال شغلك؟؟
ج : الهدف أو الفكره اني مش شرط أكون كامله في كل حاجه " جميله، دم خفيف، ستايل، جسم رفيع، احافظ على افعالي والتصنع" بالعكس انا بدأت وانا ستايلي عادي بخاف اغير ألوان معينه حتى لو هدومي كلها واحده وابتديت أثق في نفسي وانا كان وزني زايد ولسه لحد دلوقتي بس بحاول اوصل لوزن مناسب بجرب اللي انا عايزاه ومش شرط المحجبه تقفل قفل على نفسها في ستايلات معينه بالعكس تغير من طريقتها في كل حاجه وازاي البنات يحطوا ميك اب ويهتموا بنفسهم صح وان مش لازم اقول لا انا الناس هتقول عليا ايه لو بقيت مشهوره و أهلي والكلام ده عشان قدام الناس هتفتخر انهم يعرفونها .

س : اي خطواتك اللي جايه في شغلك؟؟
ج : خطواتي اللي جايه اشتغل على نفسي في الميك اب اكتر وافيد بنات اكتر وأكون موديل ميك اب لبراند ميك اب معروف وكل شويه أطور من نفسي و الاستايل بتاعي .

س : في النهايه اي النصيحه اللي تقوليها للبنات اللي عايزه تدخل المجال ده؟؟
ج : النصيحه بتاعتي تقليديه شويه هي أن رأي اي حد مش مهم الحاجه اللي تعجبك اعمليها والشغل اللي تحسي ان حد بيتحكم فيكي أو مش حاباها متعمليهاش عشان لو انتي مش مرتاحه في حاجه مش هتطلع حلوه فا بالنسبالي رأي أي حد فيا مش بحطه في دماغي إلا في حاجه انا بحاول احسن فيها لنفسي قبل أي حد .

بنشكرك يا سلمى على الحوار الجميل ده وان شاء الله تحققي اللي نفسك فيه ياارب ?