المعتقدات و المفاهيم المغلوطة عن العمل و الحياة الوظيفية

بقلم دكتور _ أحمد الفقي

المفاهيم دى ممكن تدمر حياة كتير من العمال و الموظفين أو على الاقل تخليهم مايحسوش بطعم الحياة و يتحولو لآلات
- العمل مش عبادة و لا حاجة العمل وسيلة لتوفير دخل يساعدنا على الحياة فإذا قدرت تعيش كويس من غير ما تشتغل (و طبعاً من غير ما تسرق) عيش و انبسط و اعبد ربنا بالصلاة و الصيام عشان الشغل غالباً هيخسرك دينك
- من الاخطاء الكبيرة انك تعتقد ان الشغل هو اهم حاجة فى حياتك الحياة فيها حاجات كتير و نجاحات كتير ممكن تتحقق بعيد عن الشغل- الدين. العلم. الاجتماعيات. الابناء. الهوايات فاذا كانت الامور ماشية كويس فى باقى أنشطة الحياة و متعسرة شوية فى الشغل تبقى انت كده زى الفل سيبها متعسرة و استمتع بالحياة و مافيش داعى توجع دماغك غير بالقدر اللى تحافظ بيه على الحد الادنى من الدخل
- من الاخطاء الفادحة كمان انك تعتمد عل شكل واحد من اشكال العمل (الوظيفة) كمصدر للدخل كده انت تبقى اسير لوظيفتك و ده اللى بيخليك تحرق نفسك و تخسر باقى مباهج الحياة عشان تتوافق مع نظام العمل اللى ممكن جداً يكون مبنى غلط من الاساس أو يكون القائمين عليه فسدة أو مختلين التركيز على تنويع مصادر الدخل افضل بكتير من التركيز على تحسين الكادر الوظيفى (اعمل جمعيات و اشترى شقة و اجرها اشتغل على تاكسى افتح كشك اعمل بطارية ارانب ادى دروس خصوصية اشترى و بيع على الانترنت .... اى حاجة ياخى)
- العمل مش عبادة
- سوق العمل مليان نصابيين و محتالين سواء اصحاب شركات أو موظفين وصوليين ماتخليهمش يسرقو عمرك و يضيعو مجهودك عشان يحققو امجادهم الخاصة لما تشتغل كويس لازم تكسب كويس
- قبل ما تشتغل فى وظيفة لازم تكون محدد كويس انت عايز ايه من الشغل ده (فلوس. خبرة. برستيج. تسالى....) لازم كمان يكون عندك خطة زمنية محددة للحصول على متطلباتك من العمل إذا بذلت مجهود وماحصلتش على متطلباتك حسب الخطة يبقى لازم تعيد تفكير
- زى ما اصحاب و مديرى الشركات بيعملو تقييم للمتقدمين للوظائف عشان يختارو الافضل و بيعملو تقييم للموظفين كل شوية عشان الترقيات و العلاوات انت كمان ضرورى انك تعمل تقييم للشركة اللى هتشتغل أو بتشتغل فيها و بحسب نتايج التقييم هتقرر الطريقة اللى تتعامل بيها مع شغلك