نسيو بسرعة !! كتبت : هاله شُرِيح سليم

في حياتنا هنقابل ناس كنا ليهم سند كنا معاهم في كل وقت صعب دعمناهم ،وقفنا جنبهم، شيلنا عنهم، ويمكن ضحينا من أجلهم… لكن فجأة، أول ما قامت حياتهم، نَسوا.

مش بس نَسوا المعروف، نَسوا وجودنا أصلًا، وبعضهم قابل الخير بالجحود، وردّ الإحسان بالنكران.

اللي بيؤلم مش إنك كنت طيب، ولا إنك ساعدت

اللي بيوجع هو إنك شفت وشوش تانية، وناس بتتغير فجأة كأنك ما كنتش أبدًا في حياتهم.

لكن وسط كل دا، تفتكر دايمًا:

“الجميل مش بيضيع عند ربنا، حتى لو البشر نكروه.”

يقول الشاعر:

إذا أنت أكرمت الكريم ملكتهُ

وإن أنت أكرمت اللئيم تمرّدا

القلوب الطيبة لما تعمل خير، مش بتستنى رد، لكن ما يمنعش إن النكران بيكسرها.

بس بدل ما تنكسر، ارفع إيدك لرب العالمين، وادعي:

“اللهم لا تعلق قلوبنا بخلقك، ولا تجعل حاجتنا إلا إليك، واجعل كل معروف فعلناه سببًا لرضاك عنا، لا لرضا الناس.”

الناس مش دايمًا بترد المعروف، لكن ربنا دايمًا بيرد الجميل بعطايا من حيث لا نحتسب.

وكل خير بتعمله بيرجع لك، يمكن مش من نفس الشخص، بس من السماء اللي ما بتنساش.

وفي النهاية… لا تندم على خيرٍ قدّمته، فالله لا يُضيع أجر من أحسن، حتى وإن جحده البشر