وسام خاطر تكتب : حقق ودقق 

بصلها كويس أوي من قريب ومن بعيد حقق ودقق في كل تفاصيلها. لو لاقيتها حلوة وعجباك أوعي تغيرها أو تبدلها. ماهي أصل حياتك مليان تفاصيل منها الحلو وكمان المر. وفيها برده الحلو بزيادة اللي علي غير العادة. وفيها المر زي الصبر

بس السؤال ❓ مين اللي يقدر يخليك تكمل فيها وبيها. وهل ممكن تقدر تغيرها لحدوتة حابب تحكيها؟

ولا ياتري هاتسلم ومش هاتتكلم. وهاتفضل مجبور وتتألم. أوقات بيكون لازم نقف ونتفرج علي حياتنا من بعيد ونقدر أنها مش حياتنا علشان نقدر نشوف كويس كل التفاصيل الصغيرة والكبيرة وكمان نحدد موقفنا في شوية حاجات منها اللي ممكن يعدي ومش يأذي ومنها اللي ممكن يدمر وكأنه قنبلة موقوتة هاتقطع وتكسر وتبوظ وتموت كل اللي حواليها. أحياناً بناخد قرارت منها اللي بيكون مصدره القلب ومنها اللي بيكون مصدره العقل. والأتنين أوقات بيكونوا صح وأوقات بيكونوا غلط. بس المهم أنك تكون راضي عن نفسك بعد كل قرار تاخده. إياك القرارات تاخد منك و تأثر عليك بطريقة سلبية. بس ممكن تسيطر عليها وتخليها كل مرة تاخد حاجة وحشة جواك أو يمكن تكون وجعاك أو مسببالك مرارة طول الوقت بتستطعمها. خلو قرارتكم واضحة وصريحة مفيهاش تعتيم. أوعوا تمثلوا علي نفسكم أنكم راضيين حتي ولو مثلتم علي العالم كله. أياك تخسر نفسك لإنها ملهاش بديل. ربنا وهبهالك أمانة فحافظ عليها. خد بالك إن الأمانة حسبها عسير دا لو مجرد أمانة مابالك نفسك من دم ولحم وأحساس. عمرك ما تقدر تعوضها عن لحظة أتوجعت فيها بسببك أو يمكن أتكسرت علشانك أو ضحت يمكن تفرحك. الأمانات غالية وملهاش سوفت وير. تسمح وتغير وتجدد. عمرك ما هاتعرف تعمل كده. إلا لو كنت دايما متصالح معها بتطبطب عليها وبتدللها وبتحس بيها. ساعتها هتلاقي راضية ومرضية بكل تفاصيلك. نفسك غالية وليها قيمة عالية. فكر فيها وأحسن إليها قبل ما تفوق ما تلاقيها.