إتحضر للأخضر
فى تلك الأيام مع مؤتمرالمناخ سألت عسليه الحج فهيم حماها وكانت عايزة منه طلب ذهبت إليه فى المندره اللى كان قاعد فيها ودار حوار بينهم طويل....
هيا بنا لنعرف ماذا كان الحديث وعلى ماذا.
........
بدأت عسليه الحديث : السلام عليكم يا ابا الحج عامل أيه
الحج فهيم : وعليكم السلام يا عسليه إرغى.......
عايزة أيه يا عسليه?!
عسليه : أنا لسه اتكلمت يا أبا الحج
ضحكت عسليه لأن الحج فهيم يعرفها جيداً إسترسلت فى الحديث
عسليه : بقولك إيه يا ابا الحج كنت عايزة تكييف لحسن الأوضه عندى حر خالص الله يكرمك يا ابا الحج
الحج فهيم : تكييف أيه يابت يا عسليه مش شايفه المناخ عامل إيه والإحتباس الحرارى والغازات المنبعثة من التلوث الناس كلها بتتحضر للأخضر وعايزين يوفروا فى الطاقه يابت وانتى تقولى تكييف...
عسليه ： يعنى يا أبا الحج التكيف بتاع عسليه هو اللى هيبوظ المناخ ....
... الا أيه الحكايه دى بتاعة cop ده اللى بيتكلموا عليه ده يا ابا فهيم ؟!!
الحج فهيم : بصى يابت يا عسليه الحكايه أيه بقى أن الدول الكبيره زى امريكا والصين وألمانيا ورسيا واليابان
عندهم صناعات كتيره خلت غاز الكربون يزيد خالص لحد مأثر على البيئه وعمل أختلال وعدم توازن
عسليه: يعنى هم يبقوا أغنية على حساب الغلابه ولما ربنا يكرم وعايزين نبقى زيهم يقولك المناخ وأبصر ايه ...
مين بقى اللى هيدفع تمن الليله دى يا ابا الحج عسليه الغلابنه اللى عايزة تكييف فى أُوضتها القبلية.....
يعنى هى أمريكا هتبصلى فى التكيف يلا ربنا يسهلهم وبلاش احنا .....
الحج فهيم: ماتهدى يا عسليه مش نقلل الإستهلاك ونشارك فى حل المشكله .... أطفى النور وشيلى أى حاجه تعمل تخمر فى الأرض والغيط علشان مطلعش غازات من التخمر علشان غاز الميثان أخطر ثلاثين مره من الكربون والسخام ده ...
.... والغازات الدافئه سبب الإحتباس ده ....
عسليه： استنى كده يا عم الحج أيه الغازات الدافيه دى ؟!
الحج فهيم : ماهى دى يا بت يا عسليه سبب المشكله لأن الغازات دى سبب إرتفاع درجات حراره الأرض
طبعا الحرارة هتعمل تبخر يزيد بخار الميه وغاز ثانى أكسيد الكربون وغاز الميثان وغاز اكسيد النيتروز عارفه اسمهم يا عسليه.... global warming ...
.. علشان كده هبطل أزرع رز يابت علشان التخمر بتاع الأرض بيبقى عالى جداً فى زراعه والأرز عايزين نزود الشجر ونلم بواقى الحيوانات واى مخلفات ندفنها وعايز برضوا أحول كل حاجه فى الأرض بالطاقه الشمسيه علشان التلوث
ردت عسلية： لا اله الا الله ناقص تتكلم عن الوقود الأحفورى يا ابا فهيم!!!!!
يعنى هو أنا فكرتك يا الحج يعنى احنا اللى هنبدأ يا ابا الحج بحل المشكل المناخ ....
الحج فهيم： لازم نبدأ بنفسنا يابت يا عسليه ونتحضر للأخضر....
قالت عسليه : شكل أتخضر للأخضر هيجى على دماغ عسليه من يومى حظى قليل.خلاص هنقضيها أكل سمك يا ابا الحج
علشان باين على الموضوع كبير.....
الحج فهيم : حتى السمك يابت هيقل عارفه ليه ??
لما درجة الحرارة هتزيد القطب الجليدى هيسيح وده ميا عذبه.. هيصب فين بقى....
... فى البحار والمحيطات ويخلى الملوحه تخف طبعاً وتزيد الحموضه ويزيد الغازات الدافئه اللى قلتلك عليها ....
عسليه: يعنى الزرع هيقل والسمك هيقل ويحصل فياضانات وسيول دا على كده الناس هتاكل بعضها أستر يارب والحل أية يا اباالحج فهيم ؟!!!ا
الحج فهيم : نكتر من الزراعة ونقلل من التلوث ونعمل إعادة تدوير لكل حاجة ونعتمد على الطاقه النظيفه زى الشمس وطاقة الرياح...
عملوا أجهزة يابت يا عسليه...
أجهزة تمتص غاز تانى اكسيد الكربون من الجو.....
.. التلوث لعب فى دوره الكربون علشان كده حصل الاحتباس ده ...
عسليه : يا رتنى ماسألتك يا أبا الحج .....
وفجأة دخل زوج عسليه وهى تقوم بربط دماغها لأنها كانت تشعر بالدوار سألها زوجها مالك يابت يا عسليه فى ايه ؟!!!!
عسليه : مفيش حاجه يا أخويا هطلع فوق السطوح أنتف ريش الديك الرومى اعمل هوايه صديقه للبيئه..... أهوى بيها على نفسى من الحر علشان أتخضر للأخضر سبنى فى حالى الله يرضى عليك .....
رد زوجها : مالها عسليه يا ابا الحج ؟!!!
الحج فهيم رد ضاحكاً : سيبك منها شويه وتنسى موضوع التكيف اللى كانت عايزاه ...
وظل يضحك هو وابنه على خفة دم عسليه .....
