ياسمين وعلاء الدين .. للشاعر / أشرف عبد الكريم

رجعلك بعد غلطة عمر
وبتمنى تسامحيني
في بعدك ياما شوفت المر
وجابني شوقي وحنيني
تسامحيني ..؟

حقيقي انا عمري ماتأسفت
لكن جايلك بقول أسف
كانت نزوة وفيها غرقت
ومن بعديها مش شايف ..
أنا خايف ..!

أنا خايف تضيعي مني
لكن عاجز عن التعبير
بكل كياني مستني
واديني بدأت في التغيير ..

معاكي هاكون واحد تاني
هداوي كل جرح قديم
تكوني ياسمين في حياتي
واكون ليكي علاء الدين ..
نكون أساطير ..!

وهكتب ع البساط اسمك
تناديني أكون جنبك
واشبك إيدي في ايديكي
وأصرخ في السما بحبك ..
ومين زيك ..؟

جميلة بوجهك الصافي
رقيقة بحبك الدافي
ده لو سألوني عن وصفك
كفاية قلبك الوافي ..

في بعدي عرفت ايه قيمتك
وبعدي كان على عيني
ده كل منايا اكون جنبك
في حضنك يالله ضميني ..
تسامحيني ..؟

تسامحيني هاكون شاكر
خلاص ع البعد مش قادر
وعلى قلبك أنا صابر
يدق في يوم ويحييني ..
تسامحيني ..؟