راحت فين الناس الحلوة .

بقلم / كريمة الشقري .
راحت فين الناس الحلوة ، راحت فين الكلمة الحلوة .دي كانت كلمات أغنية مشهورة ، بس ياريت تبص على الجملة دي تلاقيك بتقولها أكتر من مرة كل يوم. بتقولها لما تلاقي تصرفات غريبة بتحصل مكانتش موجودة زمان .لما تلاقي الصغير مبيحترمش الكبير، حتقولها .لماتلاقي الإبن صوته أعلى من صوت أمه وأبوه ، حتقولها. لما الأهل والأصحاب ميسألوش على بعض ، حتقولها. لماتلاقي الأخ بيسرق حق أخوه، حتقولها. لماتلاقي الأخ بيعاير أخوه بفقره، حتقولها. لما تلاقي جارك بيتجسس عليك ويتمنى يشوفك في أسوأ حال، حتقولها. لما تلاقي العيال يزعلوا ويخاصموا أمهم وأبوهم علشان رفضوا لهم طلب، حتقولها. لما الأم متعلمش بنتها إزاي تصون بيتها وزوجها، حتقولها. لما ميبقاش فيه حياء ، حتقولها. لما تلاقي جارك عنده فرح وأنت مجروح، حتقولها. لما تلاقي أفراحنا وأحزاننا باردة مفيهاش مشاعر، حتقولها. لماتلاقي البيوت محدش فاضي لحد، حتقولها. لما تحتاج لصاحب عمرك متلاقيهوش جنبك، حتقولها. لما تلاقي في المواصلات الصغير قاعد والكبير واقف ،حتقولها. لما كل حاجة حلوة يتغير طعمها، حتقولها. لما الكلمة بقت تطلع تجرح متحسسش، حتقولها. لما تشتاق للمة زمان في رمضان والمناسبات الحلوة وضحكنا وحكاوينا ، حتقولها.حتقول، راحت فين الكلمة الحلوة، راحت فين الناس الحلوة .