صرخة وجع الحياة.

الست لما بتوصل للمرحلة دي بتكون قبلهاضغطت على نفسها كتيروحاولت ترضي كل الأطراف في البيت وفي الشغل و في كل علاقاتها الإجتماعية .
والست دي حاولت تتعامل مع ضغوطات الحياة وبذلت جهد كبير لحلها لكن وجدت النتيجة ضعيفة فشعرت بإحباط ،بالإضافة إلى أنها أكيد أهملت في نفسها لدرجة إنها مش فاضية حتي تقعد مع نفسها شوية .
وكمان مسئولية البيت والأولاد إللي مفيش حد غالباً بيشيلها عنها مش بس كده،دي لو قصرت شوية بدون قصد بتلاقي كلمات اللوم والتقليل من دورها وإللي بتعمله وإللي بتسمعه كل يوم وطبعا ده وجعه مش سهل .
الست دي محتاجة إحتياجات نفسية زي الحب والتقدير والإهتمام والإحتواء و الإحترام ولأن الإحتياجات دي مش متوفرة لها بتتألم ومش قادرة تعبر !!!!
و سايبة جروحها تنزف جواها من غير ما تطلب مساعدة زي بالظبط لما تجرح أيديها في المطبخ وتتحمل علشان تعمل لأولادها الأكل وتغسل الأطباق ومتسألش في جرحها.!!!!.
وعلشان كل ده ياريت لو فيه واحدة من الستات إللي تعرفوهم بتمر بالحالة دي وخصوصاً لما نكون عارفينها إنها كانت الست الرقيقة الكيوت الناعمة ، فبلاش نلومها أو ننتقدها و أعتقد إنها عندها كفايتها من اللوم والنصائح....
ياريت نتعاطف معاها ونقدر مشاعرها ونساعدها تحب نفسها وتعرف إن من حقها تاخد بالها من نفسها، ياريت لما نسمع الصرخة دي نعرف إنها صرخة وجع لإنسانة مش لاقية نفسها ،صرخة قهر لواحدة مهضوم حقها ،ياريت منكونش إحنا والزمن عليها ،ياريت نحاول نكون سند حقيقي لها .