حكايات الغريب

 
بقلم الشاعر / أشرف عبد الكريم
اللي كان ماشي معايا
طول حياته بكلمته ..
اللي عمره ماباع صحابه
أو ضميره وذمته ..
اللي ياما كبرنا بيه
شكله كان لايق عليه
صيته زي الطبل رانن
في أي حتة بتلاقيه ..
أصله راجل في الزمان دة
له حكاية وقصة جامدة ..
في الرجولة مايتنسيش
عمره مايقولك مافيش
أصله شارب من جدوده
واللي عمله مايتحكيش ..
دنيته ماكنتش ليه
اسمه كان مسنود عليه
بس وقت الشدة فجأة
متلقاش اللي يراعيه ..
كله باعه في محنته
نسيوا خيره في قوته
واللي كان بايت في حضنه
إداله ضهره في سكته ..
هي ساقية ودايرة بينا
يوم هاييجي الدور علينا
واللي فاكر نفسه خالد
يبقى أغبى حد فينا ..
هي دي حكاية الغريب
اللي كان مني قريب
اللي مهما قولت عنه
مش هاشوف زيه طبيب ..
جملة وخلاصة الكلام
الرخيص اصبح بكام ؟
لو هنفضل زي ماحنا
يبقى ع الدنيا السلام ..
...................................