كل المنى إني أسعدك كلمات؛ أحمد حسن عمر

ساعات بأحس إني غريب

وساعات باحس إني صديق

وساعات باسبب فرحتك

لو مر ضيق

كل المنى انى اسعدك

وارسم هناكى على الطريق

و امسح بايدى دمعتك

فتزيد عيونك بالبريق

واهديكي عمري

وكل شيء

حلو وجميل

واكون جريء

وامد ايدي بالأمل

ف المستحيل

واكون شراع

وتكوني نيل

: ونحقق الاحلام سوا

ونكون دوا

ونخفف الحمل التقيل

.

نطلع لفوق سابع سما

مغرم و عاشق مغرما

ومتيمه

واثبت هواكي وفرحتي

بمليون دليل

تتجنني

زيك اكون مجنون كبير

فوق الشجر

اخدك ما بين جناحين

واطير

كل الاساطير

اللي كانت قبلنا

صبحت اخير !!

والسر طبعا سرنا

دايما ( ف ) بير

نفس الطريق ح يضمنا

نفس المصير

نلغي الحدود

ونهد سور

اخدك علي جزيرة الامل

وارمي البذور

تطرح مشاعر

ما اتقالتش ف يوم لحد

تنشر عطور

ونخرج الكبت اللي عشش

من سنين جوه الجحور

محتاج لحضن يضمني

ويحسني

محتاج اشوف للضلمة نور

وارقيكي من عين الحسود

واقيد بخور

محتاج لحضن يضمني

ايام ، شهور

نغني غنوة للفرح

نعزف شعور

ونعاند البخت الكئيب

لازم نثور

في حاجة لازم تتولد

او تتوجد

والارض بور

مشتاقه بسمة

لجل تطرح ف الزهور

معقول يكون

الحلم اني احضنك

وسط الصخور

معقول هوانا يكون حقيقة مطلقة

والباقي زور

معقوله طيفك ف الحقيقة يصدني

وف حلمي بالافراح يزور

معقول ف وسط العشق

نبني ف القصور

نجري سوا

ونضحك سوا

ونغير الاحزان هوا

ونلغي الفصول

تبقي الحياة دايما ربيع

علي قدنا

ولا يوم تبيعي او ابيع

يوم ودنا

وتكوني ام واكون رضيع

وتكوني قاضي واكون مطيع

مانخافش ابدا م العزول

..