أشرف عبد الكريم يكتب : فرسة جامحة

بتلوميني إن قبلك

قلبي حب في يوم ورق

طب ما ياما طلبت ودك

ألف مرة وقولتي لأ ..

لما كنتي فرسة جامحة

وسط حلبة بدون لجام

كل فارس خادله رفسة

لما خرف في الكلام ..

كل واحد له حكاية

جوه ألبوم ذكرياتك

كنتي بتحطي النهاية

وقت مايجيلك مزاجك ..

بس فوقي من غرورك

هي فترة خلاص وعدت

والنهاردة أهو جاي دورك

تحصدي الزرعة اللي كبرت ..

انتي عمرك يوم سألتي

قلبي عندك يسوى إيه

ولا فكرتي في مشاعري

هي راحت برة ليه ..

روحي بصي في المرايا

شوفي تجاعيدك في وشك

انتي في بداية النهاية

ووعي مكياجك يغشك ..

بقيتي زي خيل حكومة

دوره في الترتيب ورة

عايزة طلقة من ماسورة

تسعة ملي معمرة ..

كنتي فاكراني هفية

هاجري زي كتير وراكي

دنتي زمان كنتي صبية

وعمري ماتمنيت لؤاكي ..