بين زحمة الايام تاتي الجمعه لتداوي ما لا يقال

بقلم -هاله شُرِيح سليم

يوم الجمعه مش مجرد يوم عادي في الاسبوع هو نفحه روحانيه مختلفه بييجي ومعاه هدوء خاص كده بيغلف القلوب وكان ربنا بيقربنا منه اكتر ويفتح لنا باب الطمانينه على وسعه

في اليوم ده الانسان بيحس انه محتاج يهدى ويراجع نفسه ويرجع لقلبه اللي ممكن يكون اتعب من زحمه الايام لحظات بسيطه زي الدعاء او الصلاه او حتى انك تقعد مع نفسك شويه بتكون كفيله تغير احساسك كله وتفك عنك حمل كبير من غير ما تاخد بالك

ومن اجمل روحانيات يوم الجمعه انه يوم فيه ساعه استجابه اللحظه اللي ممكن دعوه واحده فيها تغير كل حاجه عشان كده بيكون اليوم ده فرصه حقيقيه انك تفتح قلبك لربنا تحكي وتدعي وتطلب من غير حدود لان ربنا قريب وسميع

وفي يوم الجمعه بتبقى القلوب اقرب لبعض والكلمه الطيبه ليها اثر اكبر والصدقه مهما كانت بسيطه بتفرق وبتجبر خواطر ناس كتير يمكن دعوه من قلب حد محتاج تكون سبب في فرج كبير ليك من غير ما تعرف

وكمان الجمعه دايما بتيجي تذكير ان مهما الدنيا تعبتك في راحه جايه ومهما تاخرت الامنيات في وقت مكتوب ليها تتحقق كل اللي عليك انك تفضل عندك يقين ان الخير جاي وان ربنا مش بينسى حد ابدا

يمكن اجمل حاجه في اليوم ده انه بيفكرك تبدا من جديد تغفر للي زعلك وتسامح وتسيب اي حمل جواك لان القلوب النضيفه هي اللي بتعرف تعيش بسلام

خلي يوم الجمعه بدايه راحه لقلبك وغسل لكل هم شيلته طول الاسبوع وافتكر دايما ان اقرب طريق للطمأنينه هو القرب من ربنا