الذكاء الوجداني: مفتاحك السري للنجاح في الحياة
بقلم - إلهام كرم جادالله
عمرك سألت نفسك، إيه هي المهارة اللي لو تعلمتها تغير حياتك كلها؟
دي مش مجرد أي مهارة، دي السر اللي ورا نجاح ناس كتير حوالينا، بس كتير مننا مش بيركز معاه أوي.
تعالى نفتكر مشهد كده من فيلم "حب البنات". فاكرين "غادة أبو حجر" اللي كانت بتقول " للأعور أعور في عينه وميهماش"؟ النوع ده من الناس، اللي ممكن يكونوا حوالينا، بيكون عندهم مشكلة كبيرة اسمها نقص الذكاء الوجداني.
طيب إيه بقى الذكاء الوجداني ده؟
ببساطة، الذكاء الوجداني هو مجموعة من المهارات اللي بتخليك تعرف تتعامل مع مشاعرك ومشاعر اللي حواليك بشكل كويس. ده سيساعدك تنجح في شغلك وفي حياتك عمومًا. زي إنك تعرف تزق نفسك وتكمل لما تتحط في مواقف محبطة، وإنك تتحكم في ردود أفعالك ومتبقاش مندفع، وإنك تعرف إزاي تهدي نفسك لما تكون متضايق ومخليش الزعل يشل تفكيرك، والأهم إنك تكون حاسس بالناس اللي حواليك وتفهمهم وتحس بيهم، ودايماً عندك أمل في بكرة.
الذكاء الوجداني ده ليه أربع جوانب مهمة: إدراك الذات (تعرف إيه هي مشاعرك وتأثيرها)، إدارة الذات (تتحكم في مشاعرك السلبية)، الوعي الاجتماعي (تفهم مشاعر الناس اللي حواليك)، وإدارة العلاقات (تعرف تتعامل مع الناس بشكل كويس وتقودهم للنجاح).
تجربة "المارشملو" الشهيرة وضحت قد إيه مهم إننا نعرف نأجل رغباتنا عشان نوصل لحاجة أكبر، وده دليل على قوة الذكاء الوجداني في تحقيق النجاح على المدى الطويل.
والعلماء لاحظوا إن فيه ناس كتير ناجحة في حياتها رغم إن ذكائهم "العادي" مش عالي قوي، وفي المقابل، فيه ناس أذكياء جداً بس مش ناجحين في حياتهم. وده أكد لهم إن الذكاء الوجداني بيمثل نسبة كبيرة من أسباب النجاح، أكتر بكتير من مجرد الذكاء العقلي. فالشخص اللي عنده ذكاء وجداني عالي بيكون عنده رأيه الخاص، بيواجه مشاكله بنفسه، بيقدر يدافع عن نفسه، بيعبر عن مشاعره بوضوح، وبيحب الناس ويحترمهم، ويتأقلم بسرعة مع أي موقف جديد، بيكون صداقات بسهولة، وبيحس بالناس وبيساعدهم.
طيب إزاي ننمي ذكائنا الوجداني؟ الموضوع بسيط وبيحتاج شوية تركيز وممارسة. عشان تعرف نفسك أكتر، حاول تكتب صفاتك الإيجابية والسلبية وتخطط إزاي تطور الأولى وتتخلص من الثانية، متهربش من مشاعرك وعبر عنها، اعرف إيه اللي بيعجبك، وسجل مشاعرك في يومياتك. وعشان علاقتك بالناس تبقى أحسن، نادي كل واحد بالاسم اللي بيحبه، ركز في لغة جسدهم، جهز أسئلة تفتح بيها حوار، اخرج مع زمايلك، دايماً حط نفسك مكان اللي قدامك، وتقبل مشاعرهم ناحيتك، واختار الوقت المناسب لو عايز تناقش أي موضوع مهم.
في النهاية، النجاح مش بس شطارة في الدراسة أو الشغل، الأهم إنك تعرف تفهم نفسك وتفهم الناس اللي حواليك. لو قدرت تعمل كده، وطورت وعيك بمشاعرك وبالمجتمع اللي أنت فيه، هتقدر تدير حياتك وعلاقاتك بشكل أحسن وتوصل لنجاح أكبر بكتير. الذكاء الوجداني هو مفتاحك السري لحياة أكثر سعادة ونجاحًا.
