”بحلم”.. للشاعر أشرف عبد الكريم

لسة عايش في البلد دي

لسة حلمي مانتهاش

أصلي زي كتير في سني

حظهم لسة ماجاش ..

قلت اغير من طباعي

وابقى وش مش بتاعي

وانسى اني كنت عايش

طول حياتي كأني راعي ..

وابتديت ابقى حلنجي

وانسى أهلي واللي مني

دوست على كل المشاعر

والجنيه بقى هو عمي ..

المهم البلية لعبت ..!

والنفوس حواليا تعبت

والصحاب مابقتش فارقة

والجيران بقابلها صدفة ..

كل حاجة جوايا ماتت

والسنين من عمري فاتت

واتنسيت ويا الليالي

شوفت دنيا وعالم تاني

ليلي كان هو النهار

همي أسأل ع الدولار

واللي شوفته مايتحكيش

ناس حقيقي ماتختشيش

وابتديت ألعن ظروفي

واسب ناس عاملين ضيوفي

واللي باين في عنيهم

انهم عايزين فلوسي

هي دي الطبقة القوية

لأ دي كانت تمثيلية

كنت فاكرهم أكابر

طلعوا بحر مالوش أخر ..

فجأة حسيت بارتعاش

صحيت في حالة اندهاش

واكتشفت أنه كابوس

قلت ملعونة الفلوس ..

واستعذت من الشيطان

قلت الله المستعان

هو ربي وحدة قادر

أنه يحقق الأحلام ...

................................