موت يا حمار .. بقلم - الشاعر أشرف عبد الكريم

وسط الزنقة تبص بعينك

مين حواليك ..!

مش هتلاقي حد يقولك

فين أراضيك

فجأة تلاقي في قلب الصورة

لوحدك واقف

تلقى الكل بيهرب قال

وعامل مش شايف

أصلك دايخ ..

بس لانك كنت الحيطة

اللي في يوم إتسندوا عليها ..

لما كانت رجليك شايلاك

وبتتباها بيها ..

إبكي عليها ..!

ابكي على الصحبة

وع الدنيا اللي انت شاريها ..

أو تلغيها ..!

إلغي الصفحة اللي انت مليت

أسماؤهم فيها ..

منتا خلاص

بعد الجنة صبحت في نار ..

موت ياحمار ..

موت علشان مقدرتش تفهم

مين تختار ؟

موت دة الموت اهون بكتير

من انك تفضل كدة محتار ..

كدة مخنوق .. اصحى وفوق ..!

منتا زرعت المر بإيدك

إشرب .. دوق !

اوعى تفكر ان الموضوع

مابقاش يعنيك ..

خاف على نفسك أحسن بكرة

تمد ايديك ..

مين يديك ؟

فين هتلاقي حد يقولك

أهلآ بيك ..

صدر حنين تبكي في حضنه

ويبكي عليك ..

يالله اتعلم ..

امسح دمعك انزع جرحك ولا تتألم ..

قوم واتعكز حتى وركز

ف اللي يسلم ..

ف اللي يخونك .. اعرف دورك ..!

انت بطل ع الشاشة حقيقي

ولا الناس مش حبة ظهورك ..

انت فعلآ حد كويس

ولا طباعك راضية غرورك ..

إرمي همومك ..!

واعمل خير هتلاقي الدنيا

جميلة بروحك

واياك تنسى ان المولى عز وجل

أكيد هايصونك ..