حسين فهمي وسميرة أحمد يستلمون تكريم سمير صبري بمهرجان المركز الكاثوليكي
أختتمت منذ قليل فعاليات الدورة الــ71 من مهرجان المركز الكاثوليكى للسينما، بحضور عدد كبير من الفنانين، أبرزهم خالد النبوي، بيومي فؤاد، مجدي كامل، سميرة أحمد، أحمد بدير، سهر الصايغ.
وتم الإعلان عن الفائزين ومن بينهم خالد النبوي أفضل ممثل عن دوره في فيلم" قمر 14"، حيث قال أثناء تسلمه الجائزة: "مبسوط اني بشوف كل الموجودين، وشكرا على استقبالكم للفن، وبشكر لجنة التحكيم على رأسها المخرج الكبير هانى لاشين اللى تشرفت بالعمل معاه، وسعيد بحضور الفنانة الكييرة سميرة أحمد والفنان الكبير حسين فهمي، وبشكر هذا المكان، وأن الدين ثقافة والفن ثقافة، شكرا على مكان حريص على الثقافة
وفاز بجائزة افضل ممثل دور ثان، بيومى فؤاد عن دوره في فيلم " الباب الأخضر"، وقال أثناء تسلمه الجائزة:" مش هقدر أتكلم كتير عشان عايز ألحق أنا وأحمد السبكي مباراة الأهلى، سامحوني، أنا سعيد ومتشرف بوجودي داخل مكان مهم وهو المركز الكاثوليكي للسينما"، وقطع السبكي كلمته مازحا:" لسة قابض مني 800 ألف حنية امبارح".
وفى لفتة إنسانية أعطى المركز الكاثوليكي للسينما جائزة التميز الفني للراحل سمير صبري عن فيلم "حدث في ٢ طلعت حرب" وتسلمها حسين فهمي وسميرة أحمد، حيث قالت أثناء تسلمها الجائزة: "أنا سعيدة بتواجدي هنا النهاردة عشان استلم جائزة أخويا وصديقي وحبيبي الأستاذ العبقري سمير صبرى اللي مش هننساه أبدا بإبداعه وشخصيته الجميلة الطيبة أنا بطلب له الرحمة، وصعبان عليا أنه مش معانا، وبشكر المركز الكاثوليكي أنه دعاني أنا والأستاذ حسين فهمي عشان نستلم جائزة الفنان الراحل سمير صبري".
بينما قال حسين فهمى: "مساء الخير.. أولا بشكر المركز الثقافى الرائع المركز الكاثوليكي اللي اتربينا في طول حياتنا الثقافية، قد ايه منذ أن كنا طلاب في معهد السينما، وقد ايه حبينا نشاطاته المختلفة، وبشكره على فكرة تكريم فنان راحل مثل الرائع سمير صبري اللى كان له إبداع فني حقيقى واتربينا عليه كلنا، وصداقته لينا كانت صداقة رائعة، واسمحولي أحتفط بالتكريم دا عشان أضعه في مكتب مهرجان القاهرة السينمائي، إخلاصا وتقديرا للمركز الكاثوليكي للسينما ".
