تخاريف .. بقلم - الشاعر/ أشرف عبدالكريم

قيمة وقامة ضيوفي الكرام

بقدم تحية وأجمل سلام

هفضفض بقلبي واقول اللي عندي

لإن اللي زيي قليل الكلام ..

تعالى ياسيدي بلاش الأسية

نرمي همومنا ونرتاح شوية

تقول اللي عندك واقول اللي عندي

دي لسة قلوبنا صافيا ونقيا ..

ليه بس بنعمل م الحبة حكاية

وتزعل وأزعل ونكتب نهاية

تشوفني ف طريقك وتنسى صديقك

كأني عدوك وعامل جناية ..

وانتي ياستي يازينة البنات

بلاش التعالي وانسي اللي فات

بدل مانعافر مانرسم مشاعر

تقرب مابينا كتير مسافات ..

ونحلم ببكرى يكون أحلى ذكرى

نجدد حياتنا ونمحي الأهات ..

وانت ياباشا ليه دمك تقيل

بتشخط وتنطر وعامل مدير

ودايمآ تطاطي ونايم يوماتي

يكنش سيادتك مهم وخطير ..

بتفرح ياسيدي نقولك أوامر

لان انت هدفك طلوع السلالم

وف كل صورة بتضحك منور

ما ده هو طبعك تحب المظاهر ..

وشايفك ياجندي ياحامي وطنا

ياحامل سلاحك ورافع علمنا

بقيت رمز لينا لأنك حقيقي

بتزرع وتصنع وتحصد عشنا ..

ولسة في واحد مجبناش في سيرته

سيادة الموظف يطول ف عمره

في شغله يوماتي ده دايمآ يعاني

ويصرخ ينادي مفيش حد سمعه ..

ياعالم سيبوني أفضفض شوية

دنا أصلي مصري وأمي بهية

بحب البلد دي وبعشق ترابها

ما هي اللي باقية وهي الوفية ..

وأخرت كلامي وكل اللي قولته

مجرد هواجس في حلمي وشوفته

وكله يفسر ومن غير مايزعل

يقولي دي رؤية ولا دي حكايته ..

أديني وصلت لنهاية كلامي

وناوي اني أختم واقدم تهاني

وكل اللي يقرا حروفي هيعرف

بإن اللي كاتب .. شاعر أغاني