أنباء اليوم المصرية في جلسة حوارية مع الفنان القدير/ محمود عامر
بين التراث والأصالة .. فنان يجمع بين الحاضر والماضي، في الماضي كان يُعرف بأداءه القوي ولازال علي نفس أداءه القوي الذي عودنا عليه رغم معاصرته للماضي إلا أن أدواره المعاصرة مواكبة لعادات وتقاليد هذا العصر.
- ضيف اليوم فنان قدير ذو موهبة متنوعة , أمتعنا على مدار 40 عام بأعماله الفنية المختلفة ,وقدم لنا أكثر من 130 عمل فنى,عمل بالعديد من المسرحيات والأفلام والمسلسلات واتجه للعمل في مجال الطفل في معظم الأعمال، شارك فى الدراما التلفيزيونية بالعديد من الأدوار الدرامية مثل مسلسل المداح بدور (عم جميل) ومسلسل المماليك بدور( هيما),وأعمال هامة مثل رأفت الهجان ,أيام المماليك , وحفر صوتة فى ذاكرة جيل كامل فى أعمال مقدمة للأطفال مثل (المغامرون الخمسة, قصص الحيوان فى القرآن , وقصص الإنسان فى القرآن , وآيات وحكايات .. وغيرها, وهو صاحب المشاركة المميزة فى برنامج مذيع العرب ,وأمتدت موهبتة للتأليف المسرحى للأطفال مثل مسرحيه أسعد سعيد فى العالم
عرف نفسه وقال ( أنا فنان مصرى عربى, حب الناس ثروتى,إسعاد الناس مهنتى, وبتمنى الاقب الفرحة في سكتى.... بحب البشر)
الفنان/ محمود عامر
(مواليد 28 أكتوبر 1955) ولد في مدينة الإسماعيلية، وهاجر منها بعد العدوان للشرقية. حاصل على بكالوريوس الخدمة الاجتماعية، وأيضًا على بكالوريوس الفنون المسرحية قسم تمثيل واخراج عام 1983، ومتزوج من الفنانه (لاشينة لاشين) ووالد المطربة (أميرة عامر).
في بداية الحوار بنرحب بحضرتك أ/ محمود وحقيقي ممتنين لتواجدك في حوارنا اليوم.
1- أ /محمود كما ذكرنا حضرتك أبدعت في العديد من مجالات الفنية لأكثر من 40 سنة , لو هنسأل حضرتك النهاردة أي من هذه المجالات الأقرب لقلبك تقولنا إيه؟
طبعاً الفنان بيشتغل فى جميع وسائل التعبير,سواء مرئية أو مسموعة أو على خشبة المسرح,كل مجال من المجالات دى له متعتة، وله البهجة اللى بيعيش فيها، لكن أقرب مكان بيأخذ فيه الفنان رد الفعل والتقدير من الجمهور فى نفس الوقت هوالمسرح، لأنه لقاء مباشر مابينه وبين المشاهد، بالإضافة إلا أن الفنان بيقدر يقيس هو واصل للناس قد إية، بمعنى إن المشاهد اللى بيشوف الفنان على شاشة التليفزيون أو السينما او بيسمعه فى الراديو أو من خلال الدوبلاج ، كل دا بيترجم فى لحظة اللقاء على خشبة المسرح مابين الممثل وبين المشاهد , ف من أمتع اللحظات اللى الفنان بيعيشها بتكون على خشبة المسرح .
2- أخر أعمال حضرتك (( حواديت الأراجوز)) , لاقى إقبال كبير من الجمهور ,ممكن تحكلنا عن التجربة؟
مسرحية حواديت الأراجوز من المسرحيات اللى ليها صدى جماهيرى واسع، ودا الموسم الثامن ليها، أجمل ما فى التجربة إن أحنا لفينا معظم مدن مصر ضمن مبادرة حياة كريمة ومسرح المواجهة، زى قرى ومدن الفيوم وبنى سويف و المنيا وسوهاج ودمياط,وبنها والأسكندرية,،
وحاليا فى الحديقة الثقافية فى السيدة زينب، و إن شاء الله فى جولة فى ربوع مصر بعد إنتهاء العرض فى القاهرة,فالعرض ممتع وهادف ويحمل من القيم الكثير, وممتع للأسرة بأكلمها كبار وصغار بيستمتعو بيه.
العرض تأليف راندا إبراهيم ، وإخراج محسن العزب ,موسيقى وائل عوض، أشعار فوزى المليجى، وتمثيل راندا قطب، عادل الكومى، عادل خلف، ومحمد بسيونى ,ونخبة من الفنانين, وإنتاج المسرح القومى للأطفال البيت الفنى للمسرح التابع لوزارة الثقافة
3- لو إتكلمنا على الدراما التليفزيونية,حضرتك أمتعتنا بشخصية عم جميل فيىط المداح ((أسطورة الوادي)) ومؤخرا أعلنت عن مشاركتك فى الجزء الثالث(( خيانة عهد)) ياترى في مفأجات هنقابلها في شخصية عم جميل؟
أولاً الجزءالثالث من المداح لم يتم تسميته بعد , لسه فى مرحله التحضير, ولم يعلن عن أى تفاصيل عن الأحداث أو الشخصيات، ولكن عهدى بمؤلفين والورشة الخاصة بالفنان أمين جمال هو الإجتهاد من أجل إسعاد وإمتاع الجماهير اللى اتعلقت بالمداح الجزء الأول والثانى.
4- الفنان حمادة هلال وفنانين أخرين قابلتهم مواقف غريبة أثناء تصوير المداح , هل حضرتك قابلت أي مواقف غريبة أو طريفة تحب تشاركنا بيها؟
هو المسلسل وكواليسه كانت بسيطة وتلقائية ولمس الناس أوى،والعمل تحسى فية بالحميمة و بأجواء الأسرة ,فمقدرش أقول موقف معين ,ولكن الكواليس كانت ممتعة ومبهجة فى وجود قائد الإخراج الأستاذ أحمد سمير فرج، بأخلاقة وإبداعه وأى ممثل محظوظ إنه يشتغل معاه ,هادىء ومحدد ومابيحجرش على إبداع الفنان.
5- تنوعت الشخصيات اللي قدمتها مابين الطيب والشرير والمصلحجى زى دور((هيما )) فى المماليك, أب الأدوار الأقرب لقلب حضرتك , وأي الأدوار أصعب فب التحضير لها بالنسبة لحضرتك؟
تنوع الأدوار دا فضل وكرم من ربنا,والتنوع بالنسبة للفنان مطلوب والحمدلله انا مش نمطى أو صاحب شخصية ثابتة,ومفيش دور صعب أو دور سهل بالنسبة للفنان كل دور له طعم خاص للممثل ,كل دور له أبعاد ومواصفات وتاريخ للشخصية مرة فلاح زى مسلسل هوجن ، دجال زى الشيخ كراكون ,مرة بائع أثار
أى الأدوار اقرب لقلبى سؤال صعب للفنان ,لأن الأعمال بالنسبة للفنان زى الأب اللى عندة أولاد كثير ,فمش هايقدر يفضل أبن على ابن تانى ، لكن من الشخصيات اللى بعتز بيها شخصية( جميل) فى المداح، شخصية( الجندى طه) فى مسلسل أيام المنيرة
,وشخصية (هيما )فى المماليك ودى أول مرة فى عمرى أعمل شخصية زى دى وكنت خايف ومشدود من ردود فعل الناس عنها , ولكن الحمد لله الناس إستقبلت الشخصية بشكل جيد وأشادو بيها وكمان شخصية( الشيخ كراكون)، شخصية ليست سوية وشريرة وعملتها بشكل كويس الحمد لله , وشخصية (عم سلامة ) فى مسلسل هوجن.
6- مؤخراً العديد من الفنانين توجهو الفترة لعقد ورش فنية, ممكن الفترة القادمة نشوف ورش فنية للفنان محمود عامر سواء لفن( التمثيل , أو الدوبلاج أو التقديم... إالخ)؟
انا مش ضد ومش مع الورش, مش ضد لأن فى ناس فعلا عايزة تعلم وناس عايزة تتعلم وتستفيد, وفى ناس بيعملو الورش بغرض التربح ، وبيقدموا وعود للمتدربين غيرحقيقة, وانا اتعرض عليا تقديم ورش (دوبلاج وتمثيل وإذاعه) و قلت إن شرطى لوحيد عدم ذكر أى وعود لأى حد بإننا هانقدمله أعمال ,اللى حابب يتعلم بجد انا تحت أمرة لكن اضحك عليه واوعد بحاجات مقدرش اعملها , دا شيئ لا أقبلة على نفسى ولا على الآخر.
7- لو اتكلمنا عن أ/ محمود عامر الإنسان , عرفنا أن زوجة حضرتك هى الفنانة الجميلة لاشينة لاشين , والإبنة المطربة أميرة عامر
هل ممكن نشوف عمل فنى غنائي يجمع بينكم قريب؟
فى أعمال فنية قدمتها مع الفنانة لاشينة زى مسلسل الحيطة و عوالم خفية ومسرحية الديكتاتور, لما بيتعرض حاجه مناسبة بتجمعنا بنشتغلها , لكن بيصادف إنشغالنا فى أعمال مختلفة و نتمنى نتجمع فى أعمال أخرى.
وبالنسبة لأميرة هى مطربة وملحنة ومدرسة فى معهد الموسيقى العربية، وعندى من الأبناء إبراهيم فى أخر سنة تصوير سينما ،
ومحمد إبنى 3 مونتاج معهد سينما يعنى أسرة فنية الحمد لله.
8-من وجهه نظر حضرتك إيه التحديات اللي بيواجها الفنانين في الوقت الحالي؟
التحديات كثيرة جدا ، خاصة مع تعدد المنصات الإليكترونية وعدم وجود مقايس أو معايير محددة , دا خلا المسائلة بالنسبه للفنانين القدامى أمثالى شديدة الصعوبة, يعنى مثلا يبقى ممثل مقدم دور بطوله ومهم ، وبعدها يتعرض عليه دور مشهدأاو مشهدين فقط ,فى فنانين كثير بدون ذكر أسماء بيتطلب منهم يعملوا كاستنج كأنهم أول مرة يمثلوا , والموضوع بيبقى صعب جدا بعد ما وصلو السن دا وكم التجارب اللى قدموها , ونتمنى من الله يرجع التليفزيون المصرى بإنتاجاتة العديدة عشان الناس دى تقدر تشتغل ,يبقى فى خط تانى مواكب للأعمال الفنية الأخرى , زى الأعمال اللى إتقدمت فى الفترة الأخيرة زى الممر والإختيار.
9-ممكن نعرف إيه آخر الأعمال اللي حضرتك مشترك فيها؟
إن شاء الله أخر الأعمال مسلسل ( أعمل إية) بطولة الفنان (خالد الصاوى) والفناة (صابرين) ومجموعة من الفنانين، إخراج أحمد عبدالحميد ، إنتاج إنريجى، تأليف محمد الحناوى .
10- ((بكرة أحلى بإذن الله)) طاقه أمل وتفاؤل حضرتك دايماً بتنشرها من خلال صفحتك,تحب تقول إيه لجمهورك والجيل الجديد اللي مهتم بالمجال الفني؟
يارب يكون بكرة أحلى كل البشر ، أقول للجيل الجديد مافيش حاجه بتيجى بالساهل ، كل شيء بالتعب والإجتهاد والكفاح، وبالإصرار والعزيمة بتحقق الهدف اللى إنت عايز توصلة, ماتعتمدش على حد ,إعتمد على الله سبحانه وتعالى ثم سعيك المخلص
وصدق حلمك هاتوصلة، إسعى هاتوصل أنا لحد هذه اللحظة بسعى وعندى أمل فى بكرة
كلمة أخيرة للمخرجين والمنتجين فى مصر ، ماتبخلوش على الفنانين اللى قدموا أدوارفى إطار فنى جيد خلال أعمال قدموها معاكم وقدموهم فى أدوار أخرى يخرجوا فيها إمكانياتهم و إبداعهم بشكل أكبر .
وفى النهاية أتمنى إن عام 2022 يكون عام خير علينا وعلى مصر كلها.
في نهاية الحوار أتقدم بخالص الشكر للفنان القدير محمود عامر علي الحوار الممتع ونتمني له المزيد من النجاح والتوفي
